د نیویارک ټایمز د یو راپور له مخې، د منتخب ولسمشر ډونالډ ترمپ لوړ پوړی سلاکار ایلن ماسک په ملګرو ملتونو کې د ایران له سفیر سره د ایران او متحده ایالاتو ترمنځ د کړکېچ د کمولو په لارو چارو خبرې کړي.
ایراني چارواکو ویلي، چې ایلن ماسک او د ایران سفیر امیر سعید ایرواني ترمنځ کتنه تر یو ساعت ډېره وه او په یو پټ ځای کې ترسره شوې. هغو دوو ایرانیاني چارواکو چې نه یې غوښتل نوم یې واخیستل شي، نیویارک ټایمز سره په خبرو کې دا لیدنه «مثبته» او «ښه خبر» بللی دی.
د ټرمپ د مخابراتو رییس سټیون چیونګ د دې پوښتنې په ځواب چې ایا داسې کومه غونډه ترسره شوې یا نه وویل:«موږ د شخصي کتنو په راپورونو تبصره نه کوو چې ترسه شوي ده یا نه.»
ایلن ماسک په دې اړه څه نه دي ویلي.
د یو لوړ پوړي ایراني چارواکي او ښاغلي ماسک تر منځ لومړنۍ مستقیمه ناسته د ټرمپ د ادارې په چوکاټ کې د تهران او واشنګټن تر منځ د اړیکو د بدلون احتمال زیاتوي.
یو بل ایراني چارواکي ویلي، چې ایلن ماسک د دغې کتنې غوښتنه کړې وه او سفیر یې ځای غوره کړی و.
دغو دوو ایراني چارواکو ویلي، چې له ښاغلي ماسک سره لیدل ایران ته د امریکايي چارواکو سره په مستقیم ډول له ناستې پرته د حل لار په توګه په پام کې نیول کیدای شي. خو ښاغلی ماسک به ډېر ژر خپله رسمي دنده پیل کړي. ټرمپ ویلي، چې ماسک به د هغه په حکومت کې د نوي «دولتي موثریت څانګې» مشري وکړي.
د ایران د بهرنیو چارو وزارت یو چارواکي ویلي، چې سفیر ایرواني ښاغلي ماسک ته د کتنې پر مهال ویلي، چې ایران غواړي د امریکا د خزانهدارۍ وزارت له بندیزونو معافیت ترلاسه کړي او له هغه یې غوښتي خپل یو شمېر تجارتونه تهران ته هم وغځوي.
په ملګرو ملتونو کې د ایران ماموریت ویلي، چې د غونډې په اړه به کومه تبصره ونه کړي.
