اسراییلي رسنیو راپور ورکړی، چې د شنبې په ماښام د بنیامین نتنیاهو د استوګنځي په انګړ کې دوه اور لګونکي توکي لګیدلي دي. اسراییلي پولیسو دا پېښه "خطرناکه" بللې او ویلي یې دي، چې د پېښې پر مهال نتنیاهو او د هغه مېرمن په کور کې نه وو.
اسراییلي پولیسو د اور لګیدونکو توکو په اړه نور معلومات نه دي ورکړي. خو ويلي یې دي، په دې اړه يې پلټنې پيل کړې دي.
د اسراییل د لومړي وزیر دفتر تر اوسه په دې اړه څه نه دي ویلي.
له یوې میاشتې څخه په لږې موده کې دا دویم ځل دی چې د اسراییل د لومړي وزیر پر استوګنځي برید کیږي.
د لړم د میاشتې په پیل کې، یوه بې پیلوټه الوتکه د بنیامین نتنېاهو په شخصي استوګنځي کې ولویده. د بې پیلوټه الوتکې د برید له امله د اسراییل د لومړي وزیر د کور د یوې کوټې کړکۍ ماتې شوې خو ودانۍ ته یې زیان نه و رسولی. نتنېاهو او مېرمن یې د پېښې پر مهال هلته نه وو.
حزب الله په رسمي توګه د دې برید مسوولیت منلی و.
