طالبان: تر ۱۵۰ ډېرې کورنۍ له دوو ګاونډیو هېوادونو راستنې شوې
د طالبانو تر واک لاندې باختر اژانس خبر ورکړی، چې تېره ورځ ۱۶۹ کورنۍ له ایران او پاکستانه افغانستان ته راستنې شوې.
د طالبانو تر واک لاندې باختر اژانس خبر ورکړی، چې تېره ورځ ۱۶۹ کورنۍ له ایران او پاکستانه افغانستان ته راستنې شوې.
دغه اژانس پر اېکس پاڼه خبر ورکړی، چې تېره ورځ د دغو راستنو شویو کورنیو له ډلې د تورخم له لارې ۳۸، د کندهار د سپین بولدک له لارې ۲۲، د نيمروز د ورېښمو پله له لارې ۴۶ او د هرات د اسلام کلا له لارې ۶۳ کورنۍ بېرته افغانستان ته راستنې شوې دي.
دغه اژانس په خپلې لیکنه کې زیاته کړې ده، چې د دغو راستنو شویو کورنیو له ډلې ۱۷ کورنۍ بېرته خپلو سیمو ته لېږدول شوې او پر لسګونو نورو کورنيو مرستې وېشل شوې دي.
له بل پلوه د افغانستان انټرنشنل - پښتو د څېړنو له مخې، په تېر یو کال کې نږدې ۷۴۰ زره افغان کډوال له پاکستانه او ۶۲۱ زره کډوال له ایران څخه بېرته افغانستان ستانه شوي دي.
خو د کډوالۍ نړۍوال سازمان وایي، چې په تېرو درېیو میاشتو کې ۷۸۶ زره ۷۶۹ افغانانو خپل هېواد پرېښی دی.
ورته مهال پاکستاني رسنیو راپور ورکړی و، چې د روان ۲۰۲۴ کال د (اکتوبر له اومې نېټې د نومبر تر پنځمې) له پاکستانه ۲۶ زره او ۴۵۰ افغان کډوال اېستل شوي دي.
د لړم په ۲۲مه بیا ایراني رسنیو ویلي و، چې د روان کال له پيله تر دې دمه ٢٣زره او ١٥٦ تنه بې اسناده افغان کډوال د دوغارون له لارې خپل هېواد ته ستانه کړل شوي دي.
