د پاکستان د کډوالو عالي کمېشنر تېره ورځ ویلي، چې د لوېدیځو هېوادونو له خوا په پاکستان کې د ډېر شمېر افغان کډوالو د منلو لپاره باید یو نړیوال کنفرانس جوړ شي. محمد عباس خان وویل لوېدیځ هیوادونه باید له پاکستانه د افغان پناه غوښتونکو د منلو بهیر چټک کړي.
پاکستانۍ ډان ورځپاڼې د محمد عباس خان له قوله ویلي، په دغه کنفرانس کې به افغانستان ته د کډوالو په خپله خوښه ستنېدو او په درېیمو هېوادونو کې د هغوی د استوګنې په څېر ننګونې و ارزول شي.
نوموړي ویلي، چې ډېر ژر به له طالبانو او د کډوالو په چارو کې د ملګرو ملتونو له عالي کمېشنرۍ سره درې اړخیزه غونډه جوړه شي، چې د افغان کډوالو او پناه غوښتونکو پر ستونزو خبرې وشي.
عباس خان وړاندې وايي، چې په لوېدیځو هېوادونو کې د مېشتېدو شاوخوا ۶۰۰ زره افغان پناه غوښتونکو په پاکستان کې د ملګرو ملتونو د کډوالو په عالي کمېشنرۍ کې نوم لیکنه کړې ده.
دغه پاکستاني چارواکي روان کال د نړۍ د هیوادونو له خوا د افغان کډوالو په کم شمېر منلو نیوکه وکړه او ویې ویل چې سږ کال د بیا مېشتیدنې لپاره له ملګرو ملتونو سره د راجستر شویو غوښتنلیکونو له ډلې یوازې اته زره کسان منل شوي.
نوموړي د افغان کډوالو د راستنېدو لپاره د افغانستان کمزوري حالت او محدودو زېربناوو ته په اشارې سره وويل، چې خپل هېواد ته د افغان وګړو د بېرته ستنېدو وړاندیز له ننګونو ډک او دغه کار ستونزمن شوی.
دغه پاکستاني چارواکي ویلي چې د بیرته ستنېدونکو کډوالو د منلو لپاره د افغانستان ظرفیت ډېر محدود دی.
د شمېرو له مخې، د افغان کډوالو د ایستلو لومړی پړاو د تېر کال په تلې میاشت کې پیل شو، چې شاوخوا ۷۰۰ زره افغان کډوال له پاکستانه وایستل شول.
ملګرو ملتونو تر دې مخکې راپور ورکړی و، چې اوسمهال ۱،۳ میلیونه افغان کډوال په پاکستان کې د (پي او ار) کارتونو لري، چې په دې وروستیو کې د پاکستان د حکومت له خوا د دغو کارتونو د ختم موده د یوه بل کال لپاره وغځول شوه.
نوموړي دغه څرګندونې په ملګرو ملتونو کې د افغانستان د غړیتوب د ۷۸مې کلیزې په مناسبت کړې دي.
د طالبانو تر واک لاندې ملي راډیو په یوه راپور کې د نوموړي له قوله ویلي، چې ښاغلي شاهین له ملګرو ملتونو غوښتي چې د افغانستان د څوکۍ د سپارلو په اړه په خپل دریځ کې له سره غور وکړي.
تېره ورځ ملګرو ملتونو په اېکس پاڼه لیکلي و، چې له نن څخه ۷۸ کاله وړاندې د ۱۹۴۶ کال د نومبر په ۱۹ مه افغانستان د ملګرو ملتونو غړی شو.
د دغه سازمان لهخوا په خپور شوي تصویر کې ښکاري، چې سفیر عبدالحسین عزیز د ملګرو ملتونو منشور ته د پابندۍ سند لاسلیک کوي.
دغه سازمان وړاندې لیکلي و، چې په همدغه کال کې د ایسلنډ او سویډن ترڅنګ افغانان د نړۍوالې ټولنې ویاړلي غړي شول.
په افغانستان کې د ملګرو ملتونو استازولۍ (یوناما) په ملګرو ملتونو کې د افغانستان د غړیتوب د ۷۸مې کلیزې په مناسبت پر اېکس پاڼه کاږلي، چې افغانستان د نړۍوالې ټولنې له ویاړه ډک غړی دی.
یوناما زیاته کړې: «په وروستیو کلونو کې د دغه سازمان فعالیتونه د افغانستان د خلکو لپاره د باثباته سولې او تلپاتې پراختیا په رامنځته کولو راټول شوي دي.»
په ملګرو ملتونو کې د افغانستان د استازولۍ سرپرست نصیر احمد فایق وایي، ۷۸ کاله وړاندې افغانستان په ویاړ سره د هغو ملتونو په ډله کې شامل شو چې د یووالي، عدالت او نړۍوالې همغږۍ لپاره یې هڅې کولې.
نوموړي په دې اړه د یوه بیان په خپرولو سره ویلي، سږکال دغه ورځ یو ځل بیا د افغانستان د تاریخ ترټولو تیاره دورو کې راځي.
هغه له نړۍوالې ټولنې غوښتي، چې په دې سختو شرایطو کې د افغانانو د بنسټیزو حقونو او ارمانونو ملاتړ ته د یووالي او همغږۍ له لارې خپله ژمنتیا یو ځلې بیا ثابته کړي.
ملالې یوسفزۍ د سې شنبه په ماښام پر اېکس پاڼې کاږلي: «زه درباندې ویاړم چې د طالبانو په وړاندې ولاړه یې او د افغان نجونو د تعلیم لپاره مبارزه کوې.»
هغې نیلا ته په خطاب کې ویلي: «ستا زړورتیا د نجونو او د نړۍ رهبرانو ته مثال دی.»
ملالې یوسفزۍ وایي: «کله چې مې په نیویارک کې له نیلا سره ولیدل، د افغان ښځو او نجونو د ځواکمنولو لپاره د هغې هوډ ډېره هڅولې وم.»
نیلا ابراهیمي د سې شنبه په ورځ د ماشومانو د سولې هغه نړۍواله جایزه وګټله، چې له دې وړاندې د اقلیم فعالې ګریټا ټنبرګ او د نجونو د زده کړو فعالې ملالې یوسفزۍ ته ورکړل شوې دي.
ابراهیمي دا جایزه په افغانستان کې د« نجونو حقونو لپاره د زړورې مبارزې» په ویاړ ترلاسه کړې ده.
نوموړې په داسې حال کې دغه جایزه ترلاسه کوي، چې له تېرو دریو کلونو راهیسې طالبانو له شپږم ټولګي پورته د نجونو پروړاندې د ښوونځیو او پوهنتونونو دروازې بندې کړې دي او د افغان ښځو د محدودولو په موخه یې لسګونه فرمانونه صادر کړي دي.
که څه هم د ښځو پروړاندې د طالبانو هر ګام له پراخو نړۍوالو غبرګونونو سره مخ شوی، خو طالبان وایي، چې د شریعت پر اساس یې افغان مېرمنو ته ټول حقونه ورکړي دي.
اخوا، د ملګرو ملتونو د سرمنشي ځانګړې استازې او په افغانستان کې د یوناما مشرې روزا اوتنبایوا هم څه موده مخکې ویلي و، چې د نجونو پر زدهکړو بندیزونه یوازې پر نجونو اغېز نه دی کړی؛ بلکې د افغانستان په کچه یې درې کلن فرصت هم ضایع کړی.
