‏طالبان: له دوو ګاونډیو هېوادونو ۱۴۱ کورنۍ راستنې شوې

دغه اژانس په اېکس پاڼه لیکلي، چې دغه کورنۍ د سپین بولدک، تورخم، اسلام کلا او ورېښمو پله له لارې راستنې شوې دي.
په دغې خپرې شوې لکینه کې راغلي، چې د دغو ۱۴۱ کورنیو له ډلې د تورخم له لارې ۲۱، د کندهار د سپین بولدک له لارې ۱۴، د نيمروز د ورېښمو پله له لارې ۵۹ او د هرات د اسلام کلا له لارې ۴۷ کورنۍ راستنې شوې دي.
د چهارشنبې په ورځ (د لړم په ۳۰مه) د ایران د کورنیو چارو وزارت د بهرنیو وګړو او کډوالو د چارو ادارې مشر ویلي و، چې ناقانونه افغانان خپل هېواد ته له ستنېدو پرته بله لاره نه لري.
له بل پلوه د کډوالو لپاره د ملګرو ملتونو عالي کمېشنرۍ ویلي، روان کال له ایران څخه د افغان کډوالو په راستنېدو کې ۱۸ سلنه زیاتوالی راغلی دی.
د طالبانو تر واک لاندې باختر اژانس بیا (د لړم په ۳۰مه نېټه) خبر ورکړی و، چې د روانې لړم میاشتې له لومړۍ نېټې تر دې دمه ۷۲۷ کورنۍ یوازې د سپین بولدک له لارې افغانستان ته ستنې شوې دي.