پاکستاني طالبانو شمالي وزیرستان کې دوه تنه د جاسوسۍ په تور وژلي
پاکستاني طالبانو د شمالي وزیرستان په پلاسین سیمه کې دوه تنه ځوانان د پاکستان پوځ او امنیتي ادارو ته د جاسوسۍ په تور وژلي دي.دغه پېښه د پلاسین په عزیزخېل سیمه کې شوې ده.
پاکستاني طالبانو د شمالي وزیرستان په پلاسین سیمه کې دوه تنه ځوانان د پاکستان پوځ او امنیتي ادارو ته د جاسوسۍ په تور وژلي دي.دغه پېښه د پلاسین په عزیزخېل سیمه کې شوې ده.
یوې سرچینې افغانستان انټرنشنل ته وویل چې دواړه کسان د وزیرو له قبیلې سره تړاو لري او د حافظ ګل بهادر جنګیالیو ترې سرونه پرې کړي دي.
ددې پېښې ویډیو افغانستان انټرنشنل ته رسېدلې ده، چې خورا بوږنوونکې صحنې لري.
دا پېښه داسې مهال رامنځته کیږي، چې دوه ورځې وړاندې په کورمه ولسوالۍ کې د شیعه- سني شخړو په پایله کې د بګن سیمې د یوه سیمه ییز ملا سر هم مخالفې ډلې پرې کړی او د پولیسو د پوستې پر سر یې د نندارې لپاره ایښی و.
د ایران د بهرنیو چارو د وزارت ویاند په راتلونکې اونۍ کې په مشهد کې د اقتصادی همکارۍ سازمان د غړو هېوادونو د بهرنیو چارو د وزیرانو د ۲۸مې غونډې د جوړېدو خبر ورکوي. د ايران، پاکستان، افغانستان او ترکيې په ګډون لس هېوادونه د دغه سيمه ييز اقتصادي سازمان غړيتوب لري.
اسماعیل بقايي وویل، وزیران او د ايکو لوړپوړي چارواکي به په دې ناسته کې ګډون وکړي.
بقايي زياته کړه چې د ایکو د غړو هېوادونو وزیران او لوړ پوړي چارواکي، د دغه سازمان د متخصصو سیمه ییزو سازمانونو مدیران او په دې مهمه سیمه ییزه غونډه کې د یو شمېر څو اړخیزو اقتصادي سازمانونو عمومي منشيان ګډون کوي.
د ایران د بهرنيو چارو وزارت ویاند ایکو د مخ پر ودې هیوادونو ترمنځ د سیمه يیزو اقتصادي همکاريو تر ټولو پخوانی تړون وباله چې د سیمه يیزو همکاریو او اقتصادي پراختیا هڅونه یې د اجنډا په سر کې ده.
هغه وویل ایران به په روان کال کې د دې ناستي مشري پر غاړه ولري.
ايکو یو دولتي سیمه يیز سازمان دی، چې په ۱۹۸۵ کال کې د ایران، پاکستان او ترکیې له خوا د غړو هیوادونو ترمنځ د اقتصادي او فرهنګي همکاریو د پراختیا په موخه جوړ شو.
په ۱۹۹۲ کال کې ایکو سازمان اووه نوي غړي ومنل، چې افغانستان، اذربایجان، قزاقستان، قرغیزستان، تاجکستان، ترکمنستان او ازبکستان پکې شامل دي.
د متحده عربي اماراتو چارواکو او د اسراییل د لومړي وزیر دفتر اعلان وکړ، چې د یو یهودي مذهبه لارښود زوی کوګان مړی موندل شوی. اسراییل دا پیښه د "یهودو ضد ترهګریز عمل" بللی او د عاملانو د تعقیب او محاکمې غوښتنه یې کړې ده.
د یوه یهودي د ورکېدو له خبر دوه ورځې وروسته، د اسراييل د لومړي وزير دفتر او ددغه هېواد د بهرنيو چارو وزارت په يوه ګډه اعلاميه کې اعلان وکړ، چې د زوي کوګان مړی په متحده عربي اماراتو کې موندل شوی دی.
د نتنیاهو دفتر ویلي، "اسراییل ژمن دی چې عدالت ته د دغه جنایت د عاملانو د راوستلو لپاره له ټولو موجودو لارو کار واخلي."
د اسراییل ولسمشر، اسحاق هرتزوګ، دا عمل "کرکه" او "له یهودانو سره د دښمنۍ یادونه" بللې ده.
هرتزوک په خواله رسنۍ اېکس کې لیکلي: "دا جرم نشي کولی موږ په متحده اماراتو یا د نړۍ په نورو برخو کې د سوکاله ټولنو له رامنځته کولو را وګرځوي بلکې دا مسیر به همداسې ادامه لري."
د اسراییل استخباراتي ادارې (موساد) اعلان وکړ، چې داسې شواهد لري چې ثابتوي دا برید یو تروریستي عمل و.
ځینو اسراییلي رسنیو د دغه برید پړه د ایران پر اسلامي جمهوریت اچولې ده.
له دې مخکې ویلا نیوز خبری وېبپاڼې خبر ورکړی و چې اسراییل داسې معلومات لري چې ښیي دغه اسراییلی د ایران د استخباراتي ځواکونو تر څارنې لاندې و.
ایراني چارواکو تر اوسه په دې اړه څه نه دي ویلي.
کوګان، دوه ګونی تابعیت درلود؛ په متحده عربي اماراتو کې د یهودي خیریه غورځنګ "حباد" استازی او د ابوظبي اوسیدونکی و.
هغه د پنجشنبې په ورځ ورک شو او دوه ورځې وروسته یې جسد په متحده عربي اماراتو کې وموندل شو.
د تحریک انصاف ګوند وايي، چې د پاکستان له بېلابېلو سیمو یې لوی کاروانونه د اسلام اباد په لور د لاریون په موخه روان شوي. خو د اسلام اباد د پولیسو مشر وايي، چې په پلازمېنه کې د ګډوډیو جوړونکي به نیسي او قانوني چلند به ورسره وکړي.
عمران خان خپلو پلویانو ته ویلي، چې د نوموړي د راخوشي کېدو په موخه دې لاریونونه وکړي.
د دغه لاریون لپاره نن یکشنبې د نومبر ۲۴مه ورځ ټاکل شوې ده.
د پاکستان د تحریک انصاف ګوند له لوري پر ټولنیزو رسنیو د لویو موټریزو کاروانونو انځورونه او ویډیوګانې خپریږي، چې د پاکستان د بېلابېلو سیمو څخه د اسلام اباد په لور روان دي.
بل خوا د پاکستان جیونیوز د اسلام اباد د پولیسو د مشر علي ناصر رضوي له قوله راپور ورکړی، او نوموړي ویلي، چې د پلازمېنې د امنیت له ګډوډونکو سره هیڅ ډول جوړجاړی نه کوي او د هغو کسانو په وړاندې به سختې قضیې ثبت کړي، چې قانون تر پښو لاندې کوي.
نوموړي زياته کړې، چې د خلکو د ژوند او مال د خونديتوب په موخه په ښار کې کلک امنيتي تدابير نيول شوي، د اوس لپاره د تګ راتګ په وړاندې خنډونه شته، خو ډير ژر به د خلکو تګ راتګ په ښار کې ډاډمن شي.
همدارنګه مرکزي حکومت د خیبرپښتونخوا، کشمیر او پنجاب له لوري اسلام اباد ته غځېدلې ټولې لارې د کانټینرونو او ځینې لارې یې په کندو کېندلو بندي کړې دي.
د راپورونو له مخې، پولیسو تردې مهاله په راولپنډۍ کې د عمران خان شاوخوا لس پلویان نیولي دي.
د اسلام اباد پولیس وايي، هره هغه څوک به زندان ته واچوي، چې په ښار کې کډوډي جوړوي او یا هم د تحریک انصاف په لاریون کې برخه اخلي.
د پاکستان په خیرپښتونخوا او بلوچستان ایالتونو کې د پولیو د درېیو تازه مثبتو پېښو په ثبتېدو سره په روان کال کې په دغه هېواد په د پولیو د مثبتو پېښو شمېر ۵۵ ته لوړ شو.
پاکستاني رسنیو د یکشنبې په ورځ راپور ورکړی، چې د دغه هېواد په بلوچستان او خیبرپښتونخوا ایالتونو کې د پولیو تازه درې مثبتې پېښې ثبت شوې دي.
پاکستاني رسنیو د پاکستان د پولیو د له منځه وړلو پروګرام له قوله راپور ورکړی، چې د پولیو تازه دوه مثبې پېښې په خیبرپښتونخوا او یوه په بلوچستان ایالت کې ثبت شوې ده.
له دې سره په پاکستان کې د پولیو د مثبتو پېښو شمېر ۵۵ ته ورسیده.
د پولیو په تازه مثبتو پېښو کې دوه یې د بلوچستان ایالت د ژوب او جعفر اباد ولسوالیو څخه او یوه مثبته پېښه د خیبرپښتونخوا یالت د دېره اسماعیل خان څخه راپور شوې ده.
د راپورونو له مخې، په روان کال کې تردې مهاله د پاکستان په بلوچستان ایالت کې ۲۵، په خیبرپښتونخوا ایالت کې ۱۵، په سند ایالت کې ۱۳ او په پنجاب او اسلام کې یوه یوه مثبته پېښه ثبت شوې ده.
پاکستان او افغانستان په نړۍ د پولیو په وایرس ککړ وروستي هېوادونه دي.
که څه هم په دغو دوو هېوادونو کې تر پنځو کلونو کم عمره ماشومانو ته په دوامداره توګه د پولیو ضد واکسین ورکول کیږي، خو لا هم یاد هېوادوونه د پولیو وایرس په مخنیوي کې پاتې راغلي.
د پاکستان د روغتیا وزارت چارواکو له کورنیو څخه غوښتي، د پولیو ضد واکسین کمپاین پر مهال خپل ماشومانو ته د واکسین څاڅکي ورکړي.
روغتايي چارواکو ویلي، چې د پولیو ضد واکسین په وروستۍ دوره کې پنځه لکه ماشومان د کورنیو له لوري له واکسین کولو څخه منعه شوي دي.
د خيبرپښتونخوا سر وزیر علي امين ګنډاپور ويلي، چې د تحریک انصاف ګوند د مشر عمران خان تر خوشې کېدو او د دغه ګوند د غوښتنو تر منلو پورې به په اسلام اباد کې پاتې وي. په پام کې ده چې د تحریک انصاف ګوند پلویان په اسلام اباد کې اعتراضي لاریون پیل کړي.
هغه د پاکستان له ټلویزیون سره په خبرو كې ویلي دي چې د پي ټي ای د بنسټګر عمران خان له خوشې كېدو وروسته به له حكومت سره خبرې پيل کړي.
د پاکستان د تحریک انصاف ګوند غړي او پلویان نن یکشنبه (د نومبر ۲۴مه) له ټول پاکستانه راغونډ شوي او غواړي په اسلام اباد کې د دغه ګوند د مشر عمران د راخوشې کیدو په غرض اعتراضي لاریون وکړي.
ښاغلي ګنډاپور ویلي، چې دی به په هر حال کې د تحريک انصاف د مشر په خبرو عمل کوي: «زما اختيار د پي ټي ای د بنسټګر عمران سره دی، چې هغه كومه خبره كوي زه به هغه څه کوم، زه او د پي ټي ای ټول غړي او پلویان به په هر حال کې د اسلام اباد ډي چوک ته ځانونه رسوو.»
نوموړي ویلي، چې د عمران خان او نورو بندیانو تر خوشې کېدو او د دوی د غوښتنو تر منلو پورې به په اسلام اباد کې پاتې وي، او د تېر ځل په څېر د لارو بندېدو سربیره هم اسلام اباد ته ځي.
هغه وويل چې د دوی لاريون سوله ييز دى او حکومت د موټرو او لويو لارو په بندولو سره خلکو ته ستونزې پيدا کړې دي.
د جمعې په ورځ د اسلام اباد پولیسو ویلي، چې قهرجن اعتراض کوونکي د امن او نظم د ګډوډولو او شخصي او حکومتي ودانیو ته د زيان رسولو پلان لري.
د پاکستان د کورنیو چارو وزیر محسن نقوي دا هم ویلي و، چې تحریک انصاف ګوند ته یې د احتجاج او پرلت اجازه نه ده ورکړې او دوی به پرېنږدي چې دغه ښار ننوځي او لاریون وکړي.