د ایران د بهرنیو چارو وزارت د حسن کاظمي قمي پر ځای د دې هېواد با تجربه ډیپلوماټ علي رضا بېکدلي د افغانستان د نوي سفیر په توګه وټاکه. بېکدلي د هغه کس ځای ناستی کېږي، چې سپاه پاسدارانو ته نږدې و، هغه د ترکیې په ګډون په یو شمېر هېوادونو کې د سفارت تجربه لري.
عراقچي د سپاه پاسدارانو د فردي انتخاب پر ځای د بهرنیو چارو وزارت با تجربه ډیپلوماټ په کابل کې وګوماره.
دا په داسې حال کې ده، چې د ایران اسلامي جمهوري هم د پاکستان او امریکا په څېر د افغانستان په چارو کې د ځانګړي استازي مقام لرې کړی دی.
د ایران د بهرنیو چارو وزارت د اطلاعاتو پر بنسټ، علي رضا بېکدلي د اذربایجان د اکو انرژۍ له پوهنتون څخه دوکتورا او د تهران له ازاد پوهنتون څخه د سیمه ییزو مطالعاتو د کارشناسۍ اسناد لري.
د ایراني رسنیو د راپورونو له مخې، نوموړی په ترکي، روسي او انګلیسي ژبو تسلط لري او له عربي او فرانسوي ژبو سره هم بلد دی.
بېکدلي خپلې ډیپلوماتیکې چارې په کال ۱۳۶۵ کال کې د ایران د بهرنیو چارو په وزارت کې پیل کړې.
نوموړی په اذربایجان، قبرس او ترکیه کې د ایران د سفیر په توګه تجربه لري.
په افغانستان کې د بېکدلي کاري تجربه هغه وخت ته ګرځي، چې نوموړي په افغانستان کې د اقتصادي بیارغونې ریاست پر غاړه درلوده.
د ایران د بهرنیو چارو د پخواني وزیر مرستیال عباس موسوي د نوموړي د ګومارنې په اړه ویلي، چې په افغانستان کې د بېکدلي له خوا د ایران د سفارت مدیریت به د دواړو هېوادونو ترمنځ اړیکو کې جدي تحرک رامنځته کړي.
حسن کاظمي قمي چې تر دې وړاندې د افغانستان په چارو کې د ایران د ولسمشر ځانګړی استازی او سفیر و. هغه د سپاه پاسداران غړی هم و او دا لومړی ځل دی، چې د افغانستان په چارو کې یو ایراني ډیپلوماټ ګومارل کېږي.
قمي د ایران او طالبانو ترمنځ اړیکو کې مهم رول درلود او تل یې د یادې ډلې ملاتړ کاوه.
د یادولو ده، چې د ایران مخکیني ولسمشر ابراهیم رییسي بیا قمي د ۱۴۰۰ کال د تلې په میاشت کې د افغانستان په چارو کې د دې هېواد د ځانګړي استازي په توګه ټاکلی و.
