طالبانو د یکشنبې په ورځ ویلي، چې د بدخشان ولایت کې یې څه باندې ۱۰۰ کسان د خشخاشو د کر په تور نیولي دي. په بدخشان کې د طالبانو د نشه یي توکو پروړاندې د مبارزې ادارې مشر شفیق الله حفیظي ویلي، چې د نیول شویو کسانو دوسیې به د دې ولایت ابتدایي محکمې ته وړاندې شي.
طالبانو یاد شمېر کسان د بدخشان په ارګو، درایم، یفتل پایان، جرم، شهدا او بهارک ولسوالیو کې د خشخاشو د کر پر مهال نیولي دي.
د طالبانو تر واک لاندې باختر خبري اژانس د نیول شویو کسانو انځورونه هم خپاره کړي دي.
د فرانسې خبري اژانس لیکلي، سره له دې چې په افغانستان کې د تېر په پرتله د کوکنارو کر ۹۵ سلنه کم شوې، خو کروندګر ورسره سخت زیانمن شوي او نه دي توانېدلي چې له بدیل کښت څخه سم عاید ترلاسه کړي.
اخوا، د ملګرو ملتونو د نشه یي توکو او جرمونو پروړاندې د مبارزې دفتر د لېندۍ په ۷مه بیا اعلان وکړ، چې په افغانستان کې د ۲۰۲۳ کال په پرتله په ۲۰۲۴ کال کې د نشه یي توکو کر ۳۰ سلنه زیات شوی دی.
د دغه دفتر د شمېرو له مخې، د ظالبانو د مشر د امر پرخلاف په روان میلادي کال کې په افغانستان کې ۴۳۳ ټُنه تریاک تولید شوي دي.
د ملګرو ملتونو د نشه یي توکو او جرمونو پروړاندې د مبارزې د دفتر په راپور کې دغه راز راغلي، چې په ۲۰۲۴ کال کې د تریاکو محصول کابو ۲۶۰ میلیونه ډالره دي، چې د تېر کال په پرتله ۳۰ سلنه زیات شوی دی.
د فرانسې خبري اژانس بیا دا هم لیکلي، چې د خشخاشو د کر مرکز له سویلي ولایتونو څخه شمال ختیځو ولایتونو په ځانګړې توګه بدخشان ولایت ته بدل شوی دی.
دا په داسې حال کې ده، چې تر دې وړاندې کروندګرو د خشخاشو د کښت د منع کېدو په غبرګون لاریونونه هم کړي و.
یو شمېر کروندګرو د روان کال په چنګاښ میاشت کې د بدخشان په درایم ولسوالۍ کې تر هغه وروسته اعتراضونه وکړل، چې طالبانو د یادې ولسوالۍ په کرګیان کلي کې د دوی د خشخاش کروندې له منځه یوړې.
معترضینو د طالبانو د مشر پر ضد شعارونه ورکول او دوی افغانستان انټرنشنل ته وویل، چې طالبانو یې ځواب په ډزو سره ورکړ او په دې نښتو کې څو کسان ووژل شول.
د ملګرو ملتونو دفتر په خپل راپور کې ویلي: «د تریاکو لوړې بیې او د زېرمو کمېدل ښایي کروندګر دې ته وهڅوي چې په دې تړاو د ممنوعیت امر تر پښو لاندې کړي.»
یادې ادارې د نړۍ له هېوادونو غوښتي، چې له افغان کروندګرو څخه د خشخاشو د منع کېدو له امله ملاتړ وکړي.
د یادولو ده، چې د افغانستان ۸۰ سلنه وګړي په کروندو ګې بوخت دي.
طالب چارواکو بیا د ملګرو ملتونو د راپور په غبرګون ویلي، چې له تریاکو سره د مبارزې په برخه کې یوازې پاتې دي.
د طالبانو د کورنیو چارو وزارت اعلان کړی، چې نړۍوالې ټولنې د نشه یي توکو د بدیل کښت په برخه کې خپلې ژمنې عملي کړي نه دي.
