د طالبانو ارګ وايي، چې د ازبکستان لومړی وزیر عبدالله عارفوف د طالبانو د ریاست الوزرا اداري مرستیال عبدالسلام حنفي سره لیدلي دي، خو دا ناسته له بیرغ پرته ترسره شوې. حنفي ویلي، چې د سفر اصلي موخه د دواړو هېوادونو ترمنځ د اړيکو پياوړتيا او پراختيا او د ګډو ګټو لاسته راوړل دي.
د طالبانو تر واک لاندې ارګ نن یکشنبه «د لیندۍ ۱۱مه» په یوه خبرپاڼه کې ویلي چې د عبدالسلام حنفي او عبدالله عارفوف ترمنځ کتنه کې د دواړو هېوادونو د سیاسي، اقتصادي، فرهنګي او همداراز سوداګریزو اړیکو پر پراختیا خبرې شوې دي.
ددې ناستې په خپرو شویو انځورونو کې د افغانستان ملي بیرغ یا د طالبانو بیرغ نه ښکاري.
طالبانو د ازبکستان د لومړي وزیر په حواله لیکلي چې هغه په دې کتنه کې د دواړو هېوادونو ترمنځ د کانونو د استخراج او سوداګریزو توکو د ټرانزیټ په برخو کې د خپل هېواد لېوالتیا ښودلې ده.
د ازبکستان لومړي وزیر عبدالله عارفوف د طالبانو له پلاوي سره په لیدنه کې ویلي چې د افغان-ټرانس لویې پروژې عملي کېدل به د افغانستان په ګډون ټولو دخیلو هېوادونو ته ډېرې ګټې ورسوي.
ارګ د طالبانو د پلاوي د مشر او د ریاست الوزرا اداري مرستیال عبدالسلام حنفي له قوله لیکلي چې د داوړو هېوادونو تر منځ سوداګریري ښه شوې ده.
حنفي دغه راز د ازبکستان د مسلمانانو ادارې رییس او لوی مفتي شیخ نور الدین خالق نظر سره هم کتلي دي. حنفي په دې ناسته کې د دواړو هېوادونو ترمنځ د نویو همکاریو د رامنځته کېدو هیله ښودلې ده.
په تيرو درېو کلونو کې د ازبکستان پلاويو څو ځله کابل ته سفرونه کړي دي.
د تلې پر ۲۰مه، د ازبکستاني پلاوي له سفر وروسته طالبانو اعلان وکړ، چې د فاریاب په میدان کې د طوطي ګازو د استخراج قرارداد یې یوه ازبکستاني شرکت ته ورکړی دی.
طالبانو ویلي چې دغه شرکت به په لس کلن تړون کې په افغانستان کې د ګازو د استخراج په برخه کې شاوخوا یو میلیارد ډالره پانګونه وکړي.
په پيښور کې د طالبانو تر واک لاندې افغان کونسلګرۍ کې ځینو سرچېنو نن یکشنبه « د لیندۍ ۱۱مه» افغانستان انټرنشنل ته وویل چې کونسل جنرال حافظ محب الله د افغانستان د انلاین ویزو د فارمونو د خرڅلاو دفتر کې هم خپلوان کښېنولي دي.
د سرچینو په وینا، دغه دفتر چې د پيښور صدر ډینز پلازا کې موقعیت لري، د افغانستان د ویزو یو فارم له زرو تر درې زره کلدارو پورې پلوري.
دوی زیاتوی چې په پيښور کې د طالبانو کونسلګرۍ یوازې ددغه دفتر فارمونه مني او چې څوک خپله په انلاین ډول فارم ډکوي هغوی ته وېزې نه صادریږي او ردیږي.
یو ځايي ډېپلوماټ وايي:« مونږ جهاد ددې غلا لپاره نه دی کړی خو اوس دلته خپله زمونږ پر سر چې مشر دی هغه فساد شروع کړی او د ویزو فارمونو ته یې دوکان جوړ کړی دی او هر اسناد چې څوک وغواړي دوی[یې] ورته د رشوت په بدل کې جوړوي.»
په پیښور کې د طالبانو د کونسل فساد د ویزو د انلاین فارمونو په خرڅلاو پورې محدود نه دی بلکې بېلابیل سندونه چې د کونسلګرۍ له خوا صادریږي، د بډو په بدل کې ورکول کېږي.
سرچېنو وویل چې په پیښور کې د طالبانو کونسل حافظ محب الله له خوا پرانیستل شوی دفتر د فساد مرکز کرځیدلی دی.
دوی زیاتوي چې دغه دفتر ته له ویزو او پاسپورټونو جوړولو نیولې د تعلیمي اسنادو تر تایید پورې هم خلک مراجعه کوي.
سرچینه وايي، هغه مراجعان چې په مستقیم ډول کونسلګرۍ ته مراجعه کوي د هغوي کارونه د کونسل حافظ محب الله له خوا په لوی لاس ځنډول کېږي، څو مجبور شي دده له خوا جوړ شوي د تماس دفتر ته ورشي او هغوي بیا د بډو په بدل کې ورته کارونه خلاص کړي.
سرچینو له افغانستان انټرنشنل سره ویزو د دغه دفتر د لوحو انځورونه هم شریک کړي دي.
د پښتونخوا په پيښور کې د افغانستان کونسلګرۍ ځینې مراجعانو هم افغانستان انټرنشنل ته وویل چې د طالبانو تر واک لاندې د افغان کونسلګرۍ د ویزو فارمونه د کونسلګرۍ پرځای په پيښور صدر ډینز پلازا کې له یوه دفتر څخه ترلاسه کوي.
د طالبانو د بهرنیو چارو وزارت تر دې دمه ددغه دفتر د پرانیستو په اړه په رسمي ډول څه نه د ویلي.
له دې وړاندې هم د طالب چارواکو اړوند د فساد راپورونه ورکړل شوي خو دغه ډله د خپلو غړو پر فساد او غیر قانوني کړنو ډېر وخت پرده اچوي.
