د موبي ګروپ مشر سعد محسني له نړۍ له هېوادونو وغوښتل، مخکې له دې چې افغانستان په یوه بل شمالي کوریا بدل شي له طالبانو سره تعامل وکړي. نوموړي له طالبانو سره تعامل د افغان ښځو د ازادیو د یوې برخې د بېرته راګرځولو لپاره وروستی فرصت ګڼلی دی.
د اسټرالیا ورځپاڼې چې له ښاغلي محسني سره یې مرکه کړې ده د یکشنبې په ورځ لیکلي، چې د موبي ګروپ مشر د امریکا او طالبانو ترمنځ د تعامل د زیاتېدو لپاره د ټرمپ له حکومت سره لابي کوي.
نوموړی باور لري، چې دغه تعامل به د ښځو د ازادیو یوه برخه بېرته راوګرځوي او ښوونځيو ته به د نجونو د ورګرځېدو چانس زیات کړي.
محسني همداراز باور لري: «تر دې وړاندې چې ځنډ وشي باید له خپل پخواني دوښمن (طالبانو) سره تعامل وکړو.»
دا په داسې حال کې ده، چې ډونالډ ټرمپ بیا د طالبانو ضد څېرې د خپل راتلونکي حکومت لپاره ټاکلي دي.
ټرمپ د طالبانو ضد څېره مایک والټز د امریکا د ملي امنیت د سلاکار په توګه ټاکلی دی او نوموړي تېر کال د کانګرس په یوې استماعیه غونډه کې د خلیلزاد په هغو څرګندونې نیوکې وکړې، چې ویلي یې و، طالبانو د داعش او القاعدې په ځپلو کې بریالی عمل کړی دی.
ښاغلي والټز وویل: «د یوې ترهګرې ډلې د له منځه وړلو لپاره پر بلې ترهګرې ډلې اتکا خطرناکه او لویه تېروتنه ده.»
محسني تر دې وړاندې له اسکای نیوز سره هم په مرکه کې ویلي و، چې طالبان بدل شوي دي او نوموړي له ټولنیزو رسنیو لکه واټس اپ، ټیک ټاک او نورو څخه د طالبانو کارونې ته اشاره وکړه.
د طلوع نیوز مالک باور لري، چې طالبان کولی شي اصلاح شي.
نوموړي همداراز ویلي و، همداسې چې د طالبانو په منځ کې بنسټپال مشران شته، عملپال مشران هم موجود دي.
د هغه په وینا، له عملپالو طالبانو سره تعامل کولای شي د اصلاحاتو لپاره له دننه څخه زمینه برابره کړي.
موبی ګروپ یوه رسنیزه ډله ده، چې د طلوع، لمر، طلوع نیوز تلویزیوني شبکې، ارمان راډیو، اراکوزیا راډیو، د باربډ د موسیقۍ سټډیو، کابورا پروډکشن او "دریا" اپ په کې شامل دي.
