د افغانستان او ترکمنستان د سرحدي سیمې اسلیم چشمه کې لنډ مهاله بندر جوړېږي
د طالبانو د مالیې وزارت وايي، چې د افغانستان او ترکمنستان د سرحدي سیمې اسلیم چشمه کې لنډ مهاله بندر جوړېږي.
د طالبانو د مالیې وزارت وايي، چې د افغانستان او ترکمنستان د سرحدي سیمې اسلیم چشمه کې لنډ مهاله بندر جوړېږي.
دغه وزارت د یوې خبرپاڼې په خپرولو سره ویلي، چې دا بندر د تجهیزاتو د لېږد او د ټاپي پروژې د کارکوونکو لپاره جوړېږي.
د خبرپاڼې له مخې، دغه پرېکړه د طالب او ترکمن چارواکو ترمنځ په کتنه کې شوې ده.
په خبرپاڼه کې بیا دا مشخصه شوې نه ده، چې دا بندر دقیق څه وخت جوړېږي.
د طالبانو د مالیې وزارت په خبره: «دغه بندر د ټاپي پروژې لپاره د افغانستان خاورې ته د تخنیکي کارکوونکو، وسایلو او ماشینرۍ په لېږدولو، د کارکوونکو د وېزو او کاري ساعتونو د مشخصولو او د ټاپي پروژې د تجهیزاتو د اسانه لېږد په موخه جوړېږي.»
دا په داسې حال کې ده، چې طالب پلاوي د ترکمنستان اړوندو مسوولانو ته د ټاپي پروژې د عملي کولو بشپړ ډاډ ورکړی او په سرحدي سیمه کې یې یادې موخې د تایید وړ بللي دي.
اخوا د ترکمنستان پلاوي هم د ټاپي پروژې د کار د چټکوالي او اړینو وسایلو د برابرولو ژمنه کړې ده.
د یادولو ده، چې د طالبانو ویاند ذبیح الله مجاهد هم تېره ورځ د یوې ویډیو په خپرولو سره ویلي و، چې په افغانستان کې د ټاپي پروژې چارې په عملي ډول روانې دي.
طالبانو نږدې درې میاشتې وړاندې په افغانستان کې د دغې پروژې پرانیسته کړې وه.
دغه پروژه په ۱۳۹۴ کال کې د افغانستان، پاکستان، ترکمنستان او هند د مشرانو له لوري د ترکمنستان په مرو ښار کې او وروسته ۱۳۹۶ کال کې د یادو هېوادونو د چارواکو له لوري د افغانستان په هرات ولایت کې پرانیستل شوه.
په څه هم طالبان د هېڅ یوه هېواد له خوا په رسمیت نه دي پېژندل شوي، خو یاده ډله د سیمې له ډېرو هېوادونو سره ښې سوداګریزې اړیکي لري.
