د سویلي کوریا ولسمشر په دغه هېواد کې پوځي حکومت اعلان کړ او د حکومت مشر یې د پوځ یو جنرال وټاکه. د سویلي کوریا ولسمشر یون سیوک یول د سه شنبې په ورځ د بیړني پوځي حکومت د اعلان پرمهال وویل چې دا ګام له "کمونیستي ځواکونو" څخه د هیواد د ساتنې لپاره اړین دی.
د نړیوالو رسنیو د رپوټونو له مخې، هغه ملت ته په ژوندۍ ټلویزیوني وینا کې وویل: "د شمالي کوریا د کمونیستي ځواکونو له ګواښونو د لیبرال سویلي کوریا د خوندیتوب او د حکومت ضد عناصرو د له منځه وړو لپاره، زه بیړنی پوځي حکومت اعلانوم. "
هغه د دغه هیواد پر اپوزیسیون تور ولګاوه چې د پارلمان په کنټرولولو، د حکومت په نسکورولو، له شمالي کوریا سره خواخوږۍ او د حکومت ضد فعالیتونو کې لاس لري.
خو له دغه اعلان څو ساعته وروسته، پارلمان د رد رایه ورکړه او د پارلمان رییس اعلان وکړ چې پوځي حکومت"باطل" دی او قانون جوړوونکي به د ولسواکۍ ساتنه وکړي.
د سویلي کوریا رسنۍ وايي، چې تېره شپه ولسمشر بیړنۍ غونډه کړې او له دې غونډې وروسته یې اعلان وکړ چې د نوموړي د استیضاح د هڅو له امله د هغه واک محدود شوی دی.
د جنوبي کوریا د پوځ جنرال پارک ان سو د پوځي حکومت د مشر په توګه ټاکل شوی.
د سي اېن اېن د رپوټ له مخې، سپینې ماڼۍ د سویلي کوریا د وضعیت په غبرګون کې اعلان وکړ چې د دغه هیواد پرمختګونه له نږدې څاري.
د سپینې ماڼۍ د ملي امنیت شورا یوه ویاند وویل: "د بایډن حکومت د سویلي کوریا له حکومت سره په اړیکه کې دی او وضعیت له نږدې څاري."
دا څلورم ځل دی چې په سویلي کوریا کې پوځي حکومت یا مارشل لا نافذیږي.
وروستی ځل شاوخوا ۴۴ کاله وړاندې په ۱۹۸۰ کال کې پوځي حکومت و، چې په پایله کې یې سلګونه زده کوونکي ووژل شول.
په دې وروستیو کې د کوریا په ټاپو کې کړکېچ زیات شوی او شمالي کوریا او سویلي کوریا یو بل ته ګواښونه کوي.
