د معلولیت لرونکو نړۍواله ورځ؛ طالبان وايي نږدې دوه لکه معلولینو ته میاشتیني امتیازات ورکوي
د طالبانو د شهیدانو او معلولینو چارو وزارت وايي، په روان کال کې یې څه د پاسه لس مېلیارده افغانۍ پر معلولینو، یتیمانو او کونډو ښځو وېشلې دي.
د طالبانو د شهیدانو او معلولینو چارو وزارت وايي، په روان کال کې یې څه د پاسه لس مېلیارده افغانۍ پر معلولینو، یتیمانو او کونډو ښځو وېشلې دي.
د ډیسمبر ۳مه نېټه د معلولیت لرونکو وګړو د نړۍوالي ورځې په نوم نومول شوې ده.
د طالبانو د شهیدانو او معلولینو چارو وزارت وايي، چې په افغانستان کې ۱۸۹۶۳۵ تنه معلول وګړي د یاد وزارت سره ثبت او راجسټر شوي دي.
د طالبانو د شهیدانو او معلولینو چارو وزارت د اطلاعاتو مشر فیصل خاموش وايي، په یادو کسانو کې د طالبانو معلول جنګیالي، د تېر حکومت معلول سرتېري او د طبیعي پېښو له امله معلول شوي کسان شامل دي.
نوموړی وايي، یادو کسانو ته له تبعیض پرته د بانکي سیسټم له لارې میاشتیني امتیازات ورکول کېږي.
خو د تېر حکومت یو شمېر معلول شوي سرتېري وايي، د طالبانو له لوري پر دوی د معلولیت لرونکو ټول امتیازات بند شوي او طالب چارواکي یوازې خپلو معلولیت لرونکو جنګیالیو ته دغه امتیازات ورکوي.
همدارنګه ښاغلی خاموش وايي، د روان کال په څو میاشتو کې یې ۱۰ مېلیارده او ۹۰۶ مېلیونه افغانۍ د بانکي سیسټم له لارې پر معلولیت لرونکو وګړو، کونډو او یتیمانو وېشلې دي.
بل خوا د ملګرو ملتونو سرمنشي انټونېو ګوټرېش د معلولیت لرونکو وګړو د نړۍوالې ورځې په مناسبت ویلي، چې سږکال د معلولیت لرونکو وګړو نړۍواله ورځ موږ ته رایادوي چې موږ د پخوا پرتله د معلولیت لرونکو خلکو رهبرۍ ته ډېره اړتیا لرو.
نوموړی وايي:« معلوملیت لرونکي کسان لا له وړاندې په ټولنه کې د تبعیض، اقلیمي بدلون او لوږې له امله بنسټیزو خدمتونو ته لاس رسی نه لري او د طبیعي پېښو له امله ډېر ځپل شوي هم دي.»
د ملګرو ملتونو سرمنشي ویلي، چې د نړۍ هېوادونو د یوه تړون له مخې ژمنه کړې ده، چې د هر عمر لرونکو معلولینو په وړاندې به هر ډول بې عدالتي له منځه یوسي.
