په اتریش کې افغان سفیرې د طالب مشرانو د نیولو د حکم له مطرح کیدو هرکلی وکړ
په اتریش کې د افغانستان سفیرې منیژې باختري د هاګ محکمې د څارنوال په وروستۍ بیانیه کې د طالبانو د چارواکو د نیولو له غوښتنې هرکلی وکړ.
په اتریش کې د افغانستان سفیرې منیژې باختري د هاګ محکمې د څارنوال په وروستۍ بیانیه کې د طالبانو د چارواکو د نیولو له غوښتنې هرکلی وکړ.
نوموړې وایي، چې دا د جنسيتي توپیر او د افغان ښځو په وړاندې د سیستماتیک تاوتریخوالي له امله د طالبانو د ځواب ویلو لپاره اساسي اقدام دی.
مېرمن باختري د یکشنبې په ورځ پر اېکس لیکلي: «زه د چیلي، کاستاریکا، هسپانیا، فرانسې، لوګزامبورګ او مکسیکو له حکومتونو هرکلی کوم، چې نړۍوالې محکمې ته یې د افغانستان او په ځانګړې توګه د افغان ښځو سخت وضعیت وړاندې کړی دی.»د هاګ محکمې یو څارنوال تېره اونۍ د پنجشنبې په ورځ له یو شمېر افغان مېرمنو سره په کتنه کې ویلي، چې ډېر ژر به د افغانستان په اړه ښه خبرونه واوریدل شي.کریم خان هیله څرګنده کړې، چې د هاګ محکمې پرېکړې به «د افغانستان د مېرمنو دردونه څه نا څه را کم کړي.»څه موده وړاندې چیلي، کاستاریکا، هسپانیا، فرانسې، مکسیکو او لوکزامبورګ په افغانستان کې د بشري حقونو څخه د سرغړونو په تړاو قضیه د هاګ نړۍوالې محکمې ته لېږلې وه، او هغې محکمې هم ویلي و، چې دغه قضیه هغوی ته رسیدلې ده.تمه کېږي، چې دغه محکمه به د هغو طالب مشرانو د نیولو حکم صادر کړي، چې د ښځو پر ضد په «سیستماتیک تاوتریخوالي» او «په افغانستان کې پر حاکم جنسیتي اپارتایډ» کې لاس لري.د شنونکو په باور، که د هاګ محکمه د قضايي تعقیب پرېکړه وکړي، د طالبانو پر چارواکو به د جنګي جرمونو او بشري ضد جرمونو په څېر جدي تورونه ولګول شي او دا د طالب مشرانو شخصي امنیت اغېزمنوي او دوی به نور هم په نړۍواله کچه منزوي کړي.
