یونېسف: د افغانستان په ۱۲ ولایتونو کې زرګونو اړمنو کورنیو سره د مرستو لپاره هڅې کوو
د ملګرو ملتونو د ماشومان د ملاتړ صندوق (یونېسف) وایي، چې د افغانستان په ۱۲ ولایتونو کې زرګونو اړمنو کورنیو سره د مرستو رسولو هڅې کوي.
د ملګرو ملتونو د ماشومان د ملاتړ صندوق (یونېسف) وایي، چې د افغانستان په ۱۲ ولایتونو کې زرګونو اړمنو کورنیو سره د مرستو رسولو هڅې کوي.
د افغانستان لپاره د یونېسف سرپرست عبدالقادر د طالبانو تر واک لاندې له طبیعي پېښو سره د مبارزې ادارې له سرپرست نورالدین ترابي سره په کتنه کې وویل، چې د افغانستان په مرکزي او ختیځ زون کې به د روانې میاشتې تر وروستیو پورې ژمنۍ او روغتیایي بستې دې ادارې ته وسپارل شي، تر څو په اړمنو خلکو و ویشل شي.د طالبانو تر واک لاندې له طبیعي پېښو سره د مبارزې ادارې د یوې خبرپاڼې په خپرولو سره د یونېسف د خدماتو د مسوول له قوله زیاته کړې، چې که څه هم یاده اداره د افغانستان په نهو ولایتونو کې ګودامونه لري، خو بیا هم هڅه کوي په یو شمېر نورو ولایتونو کې د راتلونکي لپاره د بېړنیو مرستو د رسولو په موخه ځیني نور ګودامونه هم جوړ کړي.هغه وايي: «په راتلونکي کې زمونږ هڅه دا ده، چې ګودامونه په داسې ځایونو کې جوړ کړو، چې زیانمنونکو سیمو ته نږدې وي تر څو د بېړنۍ اړتیا پر وخت له خلکو سره ژر مرستې وشي.»په خبرپاڼه کې دا نه دي ویل شوي، چې دغه دولس ولایتونه کوم ولایتونه دي.د خبرپاڼې له مخې، د افغانستان لپاره د یونېسف مشر په بېړنیو حالاتو کې د همکارۍ د چمتوالي اعلان کړی او دواړو لورو پر دوامداره همکاریو ټینګار وکړ.پر افغانستان د طالبانو له واکمنېدو وروسته د بېوزلۍ کچه لوړه شوې او د څو طبیعي پېښو له امله هم د هېواد په بېلابېلو سیمو کې خلک بهرنیو او بېړنیو مرستو ته اړتیا لري.په همدې حال کې، ډېر شمېر مرستندویه ادارې د بودیجې له کمښت سره مخ دي.څه موده مخکې د ملګرو ملتونو د بشري مرستو د همږغۍ ادارې (اوچا) په خپل وروستي راپور کې ویلي و، چې ۱۲،۴ مېلیونه وګړي د خوړو خوندیتوب نه لري او په مېلیونونه نور افغانان د بېځایه کېدو ترڅنګ د لوږې د بېړني حالت سره مخامخ دي.یادې ادارې ویلي، چې د بودیجې د کمښت له امله په افغانستان کې د مېلیونونو وګړو ژوند له ګواښ سره مخامخ شوی دی.دوی ویلي، چې د بودیجې کمښت په افغانستان کې د بشري مرستو پر لېږد منفي اغېزې کړي دي.
