د طالبانو د امر بالمعروف او نهي عن المنکر وزارت په بلخ او سمنګان ولایتونو کې د دوو کوډګرو له نیول کېدو خبر ورکړی دی. دغه وزارت وايي، چې تر دې وړاندې د دوی د محتسبانو لهخوا دغو کوډګرو ته څو ځلې د دغه کار د پرېښودو سپارښتنه هم شوې وه.
په دغې لیکنه کې راغلي: «کوډ او جادو په اسلام کې حرامه ده، ځکه چې د خلکو د ګمراه کولو او د اعتقاداتو د سنتو کمزورې کولو لامل ګرځي.»
تر دې وړاندې (د لېندۍ په ۳مه نېټه) هم د طالبانو د امر بالمعروف او نهي عن المنکر وزارت ویلي و، چې د تېرې یوې اوونۍ په اوږدو کې یې په بېلابېلو ولایتونو کې ۱۱ تنه کوډګر نیولي دي.
د دغه وزارت لهخوا په یوې خپره شوې خبرپاڼه کې راغلي و، چې دغه شمېر کوډګر یې په غزني، دایکنډي، بلخ او هلمند ولایتونو کې نیولي دي.
په افغانستان کې د کوډګرو د نیونې لړۍ له هغه وروسته پیل شوه، چې د طالبانو د امر بالمعروف او نهي عن المنکر وزارت اعلان وکړ چې په ټول افغانستان کې یې د تعویذ لیکنې او کوډګرۍ پر کاروبار بندیز لګولی دی.
د دغه وزارت ویاند محمد صادق عاکف په خپل یو بیان کې ان ویلي و، چې په «شریعت» کې د کوډګرو او ساحرانو وژلو ته جواز ورکړل شوی دی.
رینا امیري د قطر د بهرنیو چارو وزارت له ځانګړي استازي سره په لیدنه کې د دواړو هېوادونو ترمنځ د نږدې اړیکو او د هغوی د ملاتړ او پراختیا پر لارو چارو او دارنګه په افغانستان کې د ټیکاو د ټینګښت لپاره د نړۍوالو هڅو په اړه خبرې کړې دي.
دا په داسې حال کې ده د امریکا د نړۍوالې پراختیا ادارې او زده کړې د ټولو لپاره په نوم قطري بنسټ چارواکو ویلي، چې د یکشنبې په ورځ یې په افغانستان کې د هغو ماشومانو، نجونو او ځوانانو د زده کړې د ملاتړ لپاره د ۵۰ میلیونو یو تړون لاسلیک کړ چې په افغانستان کې له زده کړو پاتې دي.
دغو دوو بنسټونو د څه باندې سل زره هغو ماشومانو د ثبتولو لپاره چې له درسونو څخه پاتې شوي، په مساوي توګه ۵۰ میلیونه ډالر ځانګړي کړي او نږدې دوه زره ځوانانو ته یې تحصیلي بورسونه ورکړي دي.
ورته مهال په یوې بلې جلا ناسته کې اغلې امیري د قطر د پوهنې وزیرې سره د افغانستان په روان وضعیت خبرې کړې دي.
په دغه ناسته کې دواړو خواوو د افغانستان په ښوونیزو برخو کې د ګډو همکاریو پر اړخونو او په ځانګړې توګه د نجونو د زدهکړو او د هغوی له حقونو د ملاتړ او ودې پر لارو چارو خبرې اترې کړې دي.
