د اروپايي ټولنې شورا ویلي، چې د دې ټولنې غړو هېوادونو له روسیې سره د جګړې د دوام لپاره د اوکراین د اقتصادي ملاتړ لپاره د ۴،۱ میلیارده یورو مرسته تصویب کړې ده. اروپايي ټولنې ویلي، چې دا پیسې اوکراین ته د اروپايي ټولنې د ملاتړ یوه برخه ده.
اروپايي ټولنې د دوشنبې په ورځ ویلي، چې له اوکراین سره د مرستو یوه نوې اندازه به ډېر ژر دغه هېواد ته انتقال کړي.
د دغه ټولنې په اعلامیه کې ویل شوي، "دا پیسې د اوکراین لپاره د اروپايي ټولنې د ملاتړ یوه برخه ده او د دې هیواد له اقتصاد سره به مرسته وکړي ځکه چې اوکراین د روسیې پر وړاندې جګړې ته دوام ورکوي."
د نړۍ د سترو اقتصادي قدرتونو په ګډون د جي - ۷ هیوادونو اوکراین ته د ۵۰ میلیارده یورو پور تخصیص کړی دی. ویل کېږي، چې دغه پیسې د روسیې د کنګل شویو شتمنیو له لارې تمویلېږي.
