امریکايي او پاکستاني ډیپلوماټانو د "سیمه ییز ثبات" په اړه خبرې وکړې
د افغانستان لپاره د امریکا د سفارت سرپرستې کرن ډېکر د سې شنبه په ورځ د افغانستان په چارو کې د پاکستان له ځانګړي استازي محمد صادق سره خبرې وکړې.
د افغانستان لپاره د امریکا د سفارت سرپرستې کرن ډېکر د سې شنبه په ورځ د افغانستان په چارو کې د پاکستان له ځانګړي استازي محمد صادق سره خبرې وکړې.
محمد صادق وايي، چې په دې ناسته کې یې د "سیمې د سولې او ثبات" په اړه خبرې کړې دي.
ښاغلي صادق د افغانستان لپاره د امریکا د سفارت له سرپرستې سره د لیدنې پرمهال د خبرو په تړاو جزیات نه دي ورکړي.
همدارنګه د امریکا سفارت هم د یادې لیدنې په اړه څه نه دي ویلي.
د افغانستان لپاره د پاکستان د ځانګړي استازي په توګه د محمد صادق خان تر ټاکل کېدو وروسته دا د نوموړي لومړۍ لیدنه ده.
دا لیدنه په داسې حال کې کېږي، چې په پاکستان کې نا امنیتي او بې ثباتي په بې ساري توګه زیاته شوې ده.
بلخوا پاکستان په تېرو درېیو کلونو کې له افغانستان څخه د پاکستاني طالبانو د بریدونو په مخنیوي کې کوم د پام وړ پرمختګ نه دی کړی او دې وضیعت د افغان طالبانو او د پاکستان حکومت تر منځ د اړیکو د ترینګلتیا لامل شوی دی.
د راپورونو له مخې، پاکستان هیله لري چې محمد صادق به وکولای شي، چې د دواړو هېوادونو په ترینګلو اړیکو کې بدلون راولي او طالبان به وهڅوي، چې د تحریک طالبان پاکستان په کنټرولولو کې همکاري وکړي او د دغه هېواد پر ضد د افغان خاورې د کارولو مخه ونیسي.
