د اسلام اباد لاریونونه؛ خواجه اصف ادعا کوي، چې د ګنډاپور ساتونکو پر لاریونوالو ډزې کړي دي
د پاکستان دفاع وزیر خواجه اصف تور پورې کړی، چې د خیبر پښتونخوا د سر وزیر علي امین ګنډاپور ساتونکو پر لاریونوالو ډزې کړي دي.
د پاکستان دفاع وزیر خواجه اصف تور پورې کړی، چې د خیبر پښتونخوا د سر وزیر علي امین ګنډاپور ساتونکو پر لاریونوالو ډزې کړي دي.
نوموړی ادعا کوي، د نومبر په ۲۶مه چې کله ګنډاپور له لاریون څخه تښتېده، لاریون کوونکو د هغه پر موټر د ډبرو وارونه وکړل او دوی ثبوت لري، چې د ګنډاپور ساتونکو پر لاریون کوونکو ډزې کړې دي.د پاکستان د دفاع وزیر خواجه اصف نن سې شنبه قومي اسمبلۍ ته د خپلې وینا پرمهال وویل، چې د پاکستان تحریک انصاف ګوند د خپلو ۱۲ پلویانو د وژل کېدو یادونه کوي، خو تردې مهاله د هېڅ وژل شوي کس کورنۍ راښکاره شوي نه دي.نوموړي د خپلې وینا پر مهال زیاته کړه:« په تحریک انصاف ګوند کې مخالفتونه شتون لري، هرکس بېل بېل نظرونه شریکوي، له ثبوت پرته دغه ډول هوايي خبرې د اجتماعي شعور سپکاوی دی، د تحریک انصاف ګوند د مشرانو په څرګندونو کې تضاد دی بشرا بي بي ویلي، چې زما پرته ټول وتښتېدل.»هغه وایي: « تحریک انصاف اوس ایالتي کارټ اخیستلو لوبه پیل کړې ده، پي ټي ای تر اوسه د وژل شویو کسانو شمېر نه دی په ډاګه کړی، لطیف کهوسه یو څه وايي، نور ټول بیا بل څه وايي، دوی اوس دولس کسان یادوي خو د یادو ۱۲ کسانو سم معلومات یې هم تر اوسه له چا سره نه دي شریک کړي.»خواجه اصف همداراز وایي، چې د تحریک انصاف ګوند لس کاله وړاندې هم پر خلکو د ټولنیزې نا فرمانۍ غږ کړی و، خو هغه مهال هم چا د دوی یاد غورځنګ ته ښه راغلاست ونه ویل.د پاکستان د حاکم ګوند د دفاع وزیر خواجه اصف دغه څرګندوني په داسې مهال کړي دي، چې د تېرې میاشتې په ۲۶مه نېټه د پاکستان امنیتي ځواکونو له اسلام اباد څخه د لاریون د پای ته رسولو عملیات پیل کړل، چې همهغه مهال د خیبر پښتونخوا ایالت سر وزیر علي امین ګنډاپور او د پاکستان د پخواني لومړي وزیر عمران خان مېرمن بشرا بي بي د لاریون له سیمي څخه وتښتېدل، خو پولیسو ګڼ شمېر لاریون کوونکي ونیول او د تحریک انصاف ګوند لاریونونه پای ته ورسېدل.د تحریک انصاف ګوند غړي بیا ادعا کوي، چې د پاکستان امنیتي ځواکونو پر لاریون کوونکو ډزې کړي، چې له امله یې لسګونو کسانو ته مرګژوبله اوښتې ده.
