سیمهییزې سرچینې وایي، د خیبر پښتونخواو او بلوچستان صوبې د قومي مشرانو جرګه چې یوه اونۍ وړاندې کورمې ته تللې وه پرون بېرته له کورمې ستنه شوې او دمګړۍ د کوهاټ جرګه د سولې خبرې اترې پر مخ بیایي.
په سیمه کې ځايي خبریالانو افغانستان انټرنشنل پښتو ته منلې، چې تر اوسه د دغو جرګو پایلې هومره بریالۍ نه وې لکه څنګه چې یې ولسي خلکو تمه لرله؛ خو دوی وایي چې لا هم داسې تمې شته چې د کوهاټ جرګه ډېر ژر کورمې ته ورشي او د خبرو اترو له لارې دواړه ښکېلې غاړې یوې هوکړې او دایمي سولې ته ورسېږي.
سیمهییز خبریالان وایي، له ۶۳ ورځو را په دې خوا د پاړه چنار او پېښور تر منځ لویه لاره تړل شوې او ورسره د خرلڅۍ لاره هم بنده ده، چې له امله یې د خوراکي توکو او دارو درملو کمښت خلک سخت اندېښمن کړي دي.
په کورمې ولسوالۍ کې له څه د پاسه دوه میاشتو راهیسې د تاوتریخوالي له امله لویې لارې تړل شوې، چې دغلته د خوراکي او سون توکو د کمي له امله خلک له سختو ستونزو سره مخامخ دي. تېره ورځ د خیبر پښتونخوا صوبایي چارواکو ویلي وو، چې دوی به د چورلکو پر مټ سیمې ته دارو درمل ورسوي.
