امنیت شورا پر طالبانو د بندیزونو د څار کمېټې موده د ۱۴ نورو میاشتو لپاره وغځوله
د ملګرو ملتونو امنیت شورا د طالبانو او هغو سازمانونو پر وړاندې چې د افغانستان سوله او امنیت ګواښي، د بندیزونو د څارډلې ماموریت د ۱۴ نورو میاشتو لپاره وغځاوه.
د ملګرو ملتونو امنیت شورا د طالبانو او هغو سازمانونو پر وړاندې چې د افغانستان سوله او امنیت ګواښي، د بندیزونو د څارډلې ماموریت د ۱۴ نورو میاشتو لپاره وغځاوه.
د امنیت شورا ۱۵ غړو د جمعې په ورځ د رایو په اتفاق په ګډه پرېکړه وکړه، چې د طالبانو په وړاندې د ۱۹۸۸ بندیزونو ته دوام ورکړي.
د امنیت شورا په دې اقدام سره به طالبان تر یوه بل کاله د ملګرو ملتونو له بندیز سره مخ وي.
د دغې کمیټې په بندیزونو کې د شتمنیو ګنګل، د سفرونو بندیزونه او له یادې ډلې سره پر تړاوو لرونکو کسانو باندې د وسلو بندیز هم شامل دي.
په ملګرو ملتونو کې د امریکا استازې په افغانستان کې د سولې او امنیت د ملاتړ لپاره پر طالبانو د بندیزونو دوام مهم ګڼلی دی.
د بشري حقونو سازمان حال وش خبر ورکړی، چې د ایران د خاش ښار په خمیني روغتون کې یو افغان بلوڅ مړ شوی دی. دغه سازمان ویلي، چې دغه افغان د لړم په ۱۵مه د ایران د خاش ښار د رودکي په کوڅه کې د نامعلومو کسانو له خوا په ډزو ټپي شوی و.
د حال وش بشري حقونو سازمان، چې له ایرانه بهر فعالیت کوي په یوه راپور کې لیکلي، چې دغه افغان وګړی د ایران د خاش ښار د سراوان په څلورلارې کې د لاسي توکو په پلورلو بوخت و.
دغه سازمان ويلي، چې وژل شوی کس ۶۰ کلن محمد نورزی د محمد حسین زوی دی.
حال وش ويلي، چې ناپېژاندو وسله والو محمد نورزی شپږ مرمۍ ویشتلی و.
دغه سازمان زیاته کړې، چې نورزی د دوشنبې په ورځ د خاش ښار په خمیني روغتون کې له ۳۴ ورځو وروسته له ټپونو مړ شوی دی.
تراوسه د ایران چارواکو د دغه افغان د وژل کیدو په اړه څه نه دی ویلي.
دا په داسې حال کې ده، چې په دې وروستیو کې په ایران کې د افغان کډوالو د مړینې کچه لوړه شوې ده.
تر دې مخکې د طالبانو یوه چارواکي ویلي وو، چې په دوو میاشتو کې لږ تر لږه د لسګونو افغان کډوالو جسدونه له ایران څخه افغانستان ته انتقال شوي دي.
د افغانستان فوټبال فدراسيون له لوري د اتلانو لیګ د څلورم پړاو سيالیو پر مهال د جمعې په ورځ لومړۍ لوبه کې د هرات سرخ پوشان خوافي لوبډلې د کابل استقلال لوبډلې ته ۴ پر يو او د هرات اټک انرژۍ لوبډلې د هرات صرافانو لوبډلې ته ۲ پر یو ماتې ورکړه.
د هرات سرخ پوشان خوافي او کابل استقلال لوبډلو ترمنځ په همدې سيالۍ کې د هرات لوبډلې لوبډلمشر فرهاد عليزاده د سيالۍ په ۱۱مه، ۱۳مه، ۵۸مه او ۶۰مه دقیقه کې ګولونه وکړل.
علیزاده د ۴ ګولو په کولو د همدې سيالۍ غوره لوبغاړی هم وټاکل شو.
د همدې سياليو دويمه لوبه د هرات اټک انرژۍ او هرات صرافانو لوبډلو ترمنځ تر سره شوه، چې دوه پر يو هرات اټک انرژۍ لوبډلې وګټله.
د لوبي په ۴۷مه دقیقه کې د اټک لوبډلې مشتاق یعقوبي پنالټي ګول کړه او د لوبي په دویمه نيمايي د صرافانو لوبډلې جاوید نورزي په ۶۱مه دقیقه کې لوبه مساوي کړه؛ خو د اټک لوبغاړي امانويل په ۶۳مه دقیقه کې ګول تر سره کړ او لوبډله يې بريا ته ورسوله.
د افغانستان د فوټبال د اتلانو لیګ په څلورم پړاو کې ۱۲ لوبډلې د اتلولۍ ګټلو لپاره یو د بل سره لوبيږي.
په دې سياليو کې د کابل استقلال او جوانان پیروزي، د هرات اټک انرژي، صرافان او سرخ پوشان، د فراه ابو مسلم او عدالت، د بلخ موج ساحل، د سرپل خادم، کندهار عینو مېنه او د فاریاب خراسان او سرسبز یاشلر لوبډلې برخه لري.
د زیمبابوې کرېکټ ملي لوبډلې د افغانستان د ملي لوبډلې له لوي د ۱۵۴ منډو ورکړل شوی هدف پوره نه کړ او لوبه افغان لوبدلې د پنځوس منډو په توپیر وګټله. د درې شل اوره لوبو د دوهمې لوبې پچه افغان لوبډلې وګتله او لومړی یې د زیمبابوې په وړاندې د توپ وهنې پرېکړه وکړه.
افغان ملي لوبډلې د لوبې په لومړۍ پاڼۍ کې د درویش رسولي ۵۸، عظمت الله عمرزي ۲۸ او ګلبدین نایب د ۲۶ ناسوځیدلو منډو په مټ د شپږو لوبغاړو په زیان په شل اورونو کې کوربه لوبډلې ته د ۱۵۴ منډو هدف ورکړ.
په نننۍ لوبه کې د توپ اچونې په برخه کې یوځل بیا د افغانستان پیلیز توپ وهونکي رحمان الله ګربز په ۱۱ منډو، صدیق اتل په ۱۸ منډو او زبید اکبري د یوې منډي جوړولو وروسته خپلې ویکټې له لاسه ورکړي او د تیري لوبې په څیر یې په توپ وهنه کې کوم د پام وړ لوبه ونکړل.
خو د منځنۍ لیکې توپ وهونکو درویش رسولي د ۵۸، عظمت عمرزي ۲۸ او ګلبدین نایب د ۲۶ نا سوځیدلو منډو په مټ افغان لوبډلې سیالې لوبډلې ته د ۱۵۴ منډو هدف ورکړ.
همدارنګه د لوبې په دوهمه پاڼۍ کې د افغان توپ اچونکو د ښې توپ اچونې په پایله کې د زیمبابوې لوبډله ونه توانیدله چې د افغان لوبډلې له لورې ورکړل شوی هدف پوره کړې.
په توپ اچونه کې نوین الحق او راشد خان ۳ـ۳، مجیب الرحمن دوه، عظمت عمرزي او فرید ملک ۱ـ۱ ویکیټه واخیستله او د زیمبابوې ټول لوبغاړي یې د لوبې په ۱۷،۴ اور کې وسوځول.
د یادې لوبلړۍ لومړۍ لوبه کوربه زیمبابوې لوبډلې ګټلې وه، خو اوس دغه لوبلړۍ ۱ـ۱ مساوي شوه.
د یادې لوبلړۍ وروستۍ لوبه سبا ترسره کیږي.
د هسپانیا د بهرنیو چارو وزیر د دغه هېواد په پلازمېنه مادرید کې د افغان مېرمنو په ملاتړ کانفرانس کې پر ښځو د طالبانو بندیزونه وغندل. هغه وویل، هسپانیا د بشري حقونو د سرغړوونکو د معافیت د پای ته رسولو او افغانستان کې د شویو جرمونو د حساب ورکولو په برخه کې خپلو هڅو ته دوام ورکوي.
دغه کنفرانس «موږ ته غوږ شئ» تر سرلیک لاندي د جمعې په ورځ په مادريد ښار کې د هسپانيا په بهرنیو چارو وزارت کې د څه باندي ۵۰ افغان ښځينه فعالانو او د ځينوو هېوادونو د خاصو استازو په ګډون جوړ شو.
دغه کنفرانس د افغانستان د ښځو لپاره د سازمان په همکارۍ او د هسپانیا د بهرنیو چارو وزارت په کوربه توب د افغان ښځو لپاره د سیاسي فضا او جواب ورکونې په موخه جوړ شوی او په البانیا کې د افغان ښځو د غونډې دوام دی.
د هسپانیا د بهرنیو چارو وزیر خوزه مانویل الباس د کنفرانس د پيلولو پر مهال په خپله وینا کې د افغان ښځو پر وړاندې د طالبانو بندیزونه وغندل او ویې ویل، دا بندیزونه «نه یوازې پر ښځو برید دی، بلکې پر بنسټیزو بشري حقونو برید دی.»
هغه پر طالبانو غږ وکړ، چې ټول هغه فرمانونه لغوه کړي، چې د ښځو او نجونو تر ټولو اساسي حقونه تر پښو لاندې کوي.
د هسپانیا د بهرنیو چارو وزیر د افغانستان په ټولو سیاسي پروسو کې د ښځو د فعالې ونډې پر اړتیا ټینګار وکړ.
د دې کنفرانس د جوړېدو موخه د ښځو موضوع ته د نړۍ پام اړول او د افغان مېرمنو غږ اورېدل دي.
په دې غونډه کې د ملګرو ملتونو او نورو نړیوالو سازمانونو استازو هم حضور درلود.
الباس طالبان په افغانستان کې د بشري حقونو سرغړونکي وبلل او له بيلو هیوادونو یې وغوښتل، چې د طالبانو د حساب ورکولو لپاره د ښځو د نوښت ملاتړ وکړي.
د هسپانیا د بهرنیو چارو وزیر د ښځو پر وړاندې د تبعیض د له منځه وړلو له کنوانسیون څخه د سرغړونې له امله له طالبانو سره د قانوني چلند غوښتنه وکړه.
د هسپانیا د بهرنیو چارو وزارت په یوه اعلامیه کې لیکلي، چې دې غونډې د افغان ښځو غږ پیاوړی کړ، یوه روښانه او همغږي تګلاره یې رامنځته کړه او د ۲۰۲۴ کال د سپټمبر په میاشت کې په البانیا کې د افغان ښځو د سرمشریزې په اعلامیه کې د شویو پرېکړو د عملي کولو لپاره پر راتلونکو ګامونو موافقه شوې.
د هسپانیا د بهرنیو چارو د وزارت په اعلامیه کې راغلي، چې په دې پرېکړو کې د افغانستان په ټولو سیاسي پروسو کې د افغان مېرمنو د ماناداره ونډې اخیستنې ژمنه شامله ده.
د دوحې له پروسې سره موازي د ښځو په مشرۍ د نوښتونو، غونډو او خبرو اترو منظم ملاتړ، په افغانستان کې د بشري حقونو د سرغړونو په ځانګړې توګه د ښځو او نجونو د حقونو په اړه نړيوال عدالت ته د طالبانو د حساب ورکونې ژمنه، د دغو پریکړو بله برخه ده.
د هسپانیا د بهرنیو چارو وزارت ویلي، چې افغان ښځو هم د اقدام کولو په یوه ږغ له نړیوالې ټولنې غوښتي، چې د افغانستان په ټولو سیاسي بهیرونو کې په مانا لرونکې توګه افغان ښځې شاملې کړي او په منظم ډول په نوښتونو، غونډو او خبرو اترو کې د مادريد په څېر ملاتړ وکړي.
د هسپانیا د بهرنیو چارو وزیر د دې غونډې په څنډه کې له افغان ښځینه فعالانو سره وکتل.
د افغانستان لپاره د چین استازي یو شیاو یونګ د تاجکستان د بهرنیو چارو وزارت د ستراتیژیکو مطالعاتو د څانګې له مشر شرف رحیمي سره د لیدنې خبر ورکړی. چينايي استازي په ایکس کې لیکلي، چې له دې تاجکستاني ډیپلوماټ سره یې له افغانستان سره د مرستې په تړاو ډېرې رغنده خبرې کړې دي.
چین او تاجکستان د نورو هېوادونو په څېر لا هم طالبان په رسمیت نه پېژني؛ خو له طالبانو سره پراخې دیپلوماتیکې او اقتصادي اړیکې لري.
تاجکستان چې د ملي مقاومت د جبهې د غړو کوربه دی، له طالبانو سره يې د ډیپلوماټیکو اړیکو له ټینګولو ډډه کړې ده.
چینايي استازي د جمعې په ورځ (د لېندۍ ۲۳ مه) پر اېکس پاڼه ليکلي: «موږ نن د افغانستان د بیارغونې په برخه کې له یو بل سره د همکارۍ لپاره ډېرې ښې خبرې وکړې.»
دغه چینایي دیپلومات د دې خبرو نور جزيات نه دي ورکړي.
تاجکستاني چارواکو په تېرو درېیو کلونو کې په وار وار پر طالبانو نیوکې کړې دي.
د تاجکستان ولسمشر ويلي، چې طالبان له خپلو ژمنو سره سره په افغانستان کې د یوه جامع حکومت د جوړېدو مخالف دي.
امام علي رحمان په ۱۴۰۱ کال کې ويلي و، چې طالبان په افغانستان کې د بېلابېلو قومونو پر وړاندې د تبعیض څخه ډکه پالیسي تعقیبوي.