د خیبر پښتونخوا په کوهاټ کې جوړه شوې قومي جرګه چې په کورمه کې د راټوکیدلي کړکېچ د هواري لپاره هلې ځلې کوي وایي چې په ډېرو اختلافي ټکو هوکړه شوې او ښایي ډېر ژر یې له خلکو سره د جرګې پرېکړې شریکې شي.
په سیمه کې خبریالان وایي، چې د جرګې مشرانو ورته ویلي، د جرګې له سترو پرېکړو یوه یې د پاړه چنار او پېښور تر منځ د لویې لارې خلاصول دي.
دوی دا رنګه ویلي چې د خرلڅۍ دروازه او نورې لویې او وړې لارې به هم ډېرې ژر د تګ راتګ لپاره پرانیستل شي.
د پاړه چنار او پېښور تر منځ لویه لار چې څه د پاسه دوو میاشتو راهیسې تړل شوې، له امله یې په پاړه چنار او د کورمې په نورو سیمو کې د خوراکي او سون توکو بیې لوړې شوې او دارو درمل هم نه پیدا کیږي چې دغې ستونزې د ولسي خلکو کړاوونه او لالهاندۍ ډېرې کړېدي.
دغه کړکېچ له هغه وروسته راوټوکېد چې په یو موټریز کاروان وسله والو برید وکړ او په ترڅ کې یې د ښځو او ماشومانو په ګډون ۶۴ کسان ووژل شول او همدومره نور ټپیان شوي وو.
له هغې وروسته دغې شخړې فرقه ایزه بڼه خپله کړه او د شیعه او سني مذهبو تر منځ وسله واله جګړه ونښته چې د راپورونو له خوا ۱۳۳ کسان په کې د دواړو خوا وژل شوي وو.
د دغه راټوکیدلي کړکیچ د هواري لپاره لومړی د خیبر پئتونخوا او بلوچستان صوبو ۱۲۵ کسیزه جرګه سیمې ته ورغلې وه، خو ډېرې مثبتې پایلې یې نه لرلې، د یوې اونۍ راهیسې په کوهاټ کې ناستې جرګې د دواړو غاړو سره خبرې اترې کړې، او ډاډ څرګندوي چې ډېر ژر به د دغه روان کړکیچ لپاره د هواري لارې چارې په ګوته کړي.
