د بشري حقونو د فعالانو ټولنې په یوه راپور کې لیکلي چې د ابوظبي په بشري ښارګوټي کې د افغان پناه غوښتونکو ژوند «ناانساني او د زندان په څېر» دی. د دغه راپور له مخې، دغه ښارګوټی په لرې پرته صنعتي سيمه کې جوړ شوی او د ژوند لومړنۍ اسانتياوې نه لري.
د بشري حقونو د فعالانو ټولنې د جمعې په ورځ د لیندۍ ۲۳مه د متحده عربي اماراتو او طالبانو ترمنځ افغانستان ته د کډوالو د بېرته ستنولو په اړه د یوې شکمنې هوکړې خبر ورکړ.دغه سازمان ویلي، «د کمپ له دننه څخه ترلاسه شوي مستند راپورونه او ویډیوګانې د بیان پر ازادۍ سخت محدودیتونه، د ژوند ناسم شرایط، او د متحده عربي اماراتو د حکومت او طالبانو ترهګرې ډلې تر منځ د شکمنو تړونونو له مخې افغانستان ته د کډوالو د بېرته راستنیدو ښکاره هڅې په ډاګه کوي.»د ۱۴۰۰ په زمري میاشت کې واک ته د طالبانو له رسیدو وروسته، امریکا یو زیات شمېر افغانان له کابل څخه ابوظبۍ ته ولېږدول.ډیری دغو کډوالو په دغه بشري کمپ کې د ژوند شرایط د خندا وړ بللي او د سفر د محدودیتونو، په تنګو بوینو خونو کې د ژوند کولو او په نا روغتیايي ناپاکو شرایطو کې هلته له ژوند کولو څخه شکایت کړی دی.د بشري حقونو د فعالانو ټولنه وايي، مالګینو او ککړو اوبو، زهرجنې هوا، بې کیفیته خوړو او لوړو دیوالونو په دغه ښارګوټي کې ژوند د یوه زندان په څېر کړی او د ښځو او ماشومانو په ګډون یې د شاوخوا ۴۵ کډوالو فزیکي او رواني روغتیا یې له ګواښ سره مخامخ کړې ده.دغه بنسټ ادعا کړې چې د متحده عربي اماراتو چارواکي په دغه ښارګوټي کې د کډوالو د اعتراضونو د ویډیو جوړولو مخه نیسي او ښځو ته جدي ګواښونه شوي دي.د راپور له مخې، «په دې قضیه کې د حاجي نبي په نوم د یوه کس د لاس لرلو شواهد شته چې له طالبانو سره مستقیمې اړیکې لري.»دغه بنسټ د خپلو سرچینو په حواله لیکلي چې د «حاجي نبي په نوم یو کس چې له طالبانو سره مستقیمې اړیکې لري، د متحده عربي اماراتو د حکومت او طالبانو تر منځ د منځګړي په توګه کار کوي. هغه افغانستان ته له سفر او له طالب مشرانو سره تر لیدو وروسته په دغه کمپ کې د شکمنو سیاستونو پلي کولو ته دوام ورکړی دی.»طالبانو لا په دې اړه څه نه دي ويلي.
خو د بشري حقونو فعالانو ټولنې د بشري حقونو له نړۍوالو بنسټونو او د دغو پناه غوښتونکو د دوسیو په تړاو له هېوادونو په ځانګړې توګه له امریکا غوښتي چې د دغو افغانانو د وضعیت څېړلو او خوندي هېوادونو ته د هغوی لېږدولو ته لومړیتوب ورکړي.
د بشري حقونو د فعالانو ټولنې ټینګار کړی چې د هر ډول جبري ستنېدو مخه باید ونیول شي چې د دغو خلکو ژوند او خوندیتوب له ګواښ سره مخ کوي
