په غزه کې د ماشومانو او دوامداره جګړې په اړه د یونیسف اجرایوي رییس کاټرین رسل په یوه بیان کې ویلي، چې په غزه کې د روانې جګړې تر ټولو لوړه بیه فلسطیني ماشومان پرې کوي. ښاغلي رسل ویلي، چې په څه باندې یوه کال کې په غزه کې له ۱۴۵۰۰ څخه ډير ماشومان وژل شوي.
د ملګرو ملتونو د ماشومانو د ملاتړ صندق (یونسېف) د شبنې په ورځ د کاټرین رسل د یوه بیان په خپرولو سره ویلي، چې تېره ورځ د غزې په مرکزي برخه کې د نصیرات په کمپ باندې په یوه ویجاړوونکي برید کې، ۳۳ کسان ووژل شول چې لږ ترلږه پکې اته ماشومان دي او ۵۰ نور د هوایي بریدونو له امله ټپیان شوي دي.
په دغه بیان کې ویل شوي:«وروستي تاوتریخوالي د یوې میاشتې په لږه موده کې په غزه کې د ۱۶۰ څخه د زیاتو ماشومانو وژل کېدل شمېر نور اضافه کوي. دا د نومبر له پیل راهیسې هره ورځ په اوسط ډول څلور ماشومان وژل کیږي.»
ښاغلي رسل په غزه کې د ماشومانو د دوامداره وژل کېدو په اړه ژوره اندیښنه ښودلې او غوښتنه یې کړي، چې ژر تر ژره دې جګړه ودرول شي.
کاټرین رسل وايي:«ماشومانو دا شخړه نه ده پیل کړې او دوی د دې د بندولو توان نلري، خو بیا هم دوی د خپل ژوند او راتلونکي سره تر ټولو لوړه بیه ورکوي.»
نوموړي ویلي، چې د راپورونو له مخې په تیرو ۱۴ میاشتو کې، له ۱۴۵۰۰څخه ډیر ماشومان وژل شوي دي او په غزه کې شاوخوا ټول ۱.۱ ملیون ماشومان د ساتنې او رواني روغتیا ملاتړ ته بیړنۍ اړتیا لري.
نوموړي زیاته کړې«په غزه کې ماشومان او کورنۍ له دوامداره بې ځایه کیدو سره مخ دي، چې ۱.۹ میلیونه خلک یې له خپلو کورونو څخه ایستلي دي، چې په کې سلګونه زره ماشومان هم شامل دي. په غزه کې نه خوندي ځای شته او نه هم د ماشومانو لپاره د ثبات احساس، چې د ژمي د تودوخې په راټیټیدو سره اړین توکي لکه خواړه، خوندي اوبه، طبي توکي او ګرمې جامې نلري.»
د ملګرو ملتوونو د ماشومانو د صندوق اجرایوي رییس په بیړني ډول د جګړې په ټولو خواوو غږ کړی، چې د ماشومانو د کړاو د پای ته رسولو لپاره پرېکنده اقدام وکړي.
