د طالبانو ستره محکمه وايي، چې په کندوز کې یې درې تنو ته د «لواطت» په تور تعزیري سزا ورکړې ده. پر طالبانو له نړۍوالو نیوکو سره دغې ډلې په عام محضر کې د سزاګانو لړۍ روانه ساتلې ده.
د طالبانو سترې محکمې نن شنبه د (لیندۍ ۲۴مه) د یوې خبرپانې په خپرولو سره ویلي، چې د کندوز ولایت د علي اباد ولسوالۍ ابتدایه محکمې درې تنو ته د «لواطت» په تور تعزیري سزا ورکړې ده.د طالبانو له خوا په عام محضر کې خلکو ته بدني سزاګانې په نړۍواله کچه غندل شوې خو طالبان یې د «شریعت» تطبیق بولي.د طالبانو د سترې محکمې د خبرپاڼې له مخې، دغه پرېکړه د دغې ډلې د سترې محکمې له تایید وروسته د کندوز ولایت علي اباد ولسوالۍ ابتدایه محکمې په عام محضر کې پر درې تنو عملي کړه.په خبرپاڼه کې د تورنو کسانو د هویت په اړه څه نه دي ویل شوي خو وايي، د محکمې د پرېکړې له مخې طالبانو لومړی تورن کس یې په اووه کاله تنفیذي بند سزا محکوم او ۳۹ دورې وهلی او دویم کس یې په پنځه کاله بند سزا او ۳۹ دورې وهلی او درېیم یې په څلور کاله تنفیذي بند سزا محکوم او ۳۹ دورې یې وهلی دی.که څه هم پر طالبانو په عام محضر کې د بدني سزا ورکولو په اړه د بشري حقونو د ملاتړو سازمانونو له لوري سختې نیوکې کېږي؛ خو لا هم طالبان لږ تر لږه په یوه یا دوو ورځو کې د افغانستان په بېلابېلو ولایتونو کې پر خلکو په عام محضر کې بدني سزاوې عملي کوي.د طالبانو دغه کړنې په نړۍواله کچه غندل کېږي؛ خو طالبان وایي دوی «د اسلامي شریعت» د تطبیق په موخه دغه چاره ترسره کوي.
