د طالبانو د ټولګټو چارو وزارت ویاند محمد اشرف حقشناس خبر ورکړی، چې د کابل ـ غور لویه لاره بېرته د تګ راتګ لپاره پرانیستل شوه. هغه نن سهار ویلي و، چې دغه لاره تېره شپه د ډېرو واورو ورېدو له امله تړل شوې ده.
دغه لاره تېره شپه په بندبکک سیمه کې د درنې واورې او چټک توپان له امله تړل شوې وه.
ښاغلي حقشناس تر دې وړاندې هم ویلي و، چې په سالنګونو کې له تېرې شپې راهیسې واوره ورېږي.
د هغه په وینا، په شمالي او سوېلي سالنګونو کې د واورې کچه تر ۷سانتي مترو رسېدلې، د دید کچه درې کیلومټره، د سېلیو چټکوالی په یوې شېبه کې دوه متره، د تودوخې لوړه درجه منفي ۱.۵ او د تودوخې ټیټه درجه بیا منفي ۷ ته رسېږي.
خو هغه زیاته کړې وه، چې پر دغې لارې لا هم د موټرو تګ راتګ دوام لري.
تېره ورځ هم د طالبانو تر واک لاندې باختر اژانس خبر ورکړی و، چې د هرات ـ تورغونډۍ لویه لاره د درنې واورې ورېدو له امله د تګ راتګ لپاره تړل شوې ده؛ خو طالبانو لا د دغې لارې د خلاصون په اړه څه نه دي ویلي.
