د طالبانو تر واک لاندې باختر اژانس خبر ورکړی، چې دغې ډلې د کابل په ۲۲ ناحیو کې پر خلکو په کمه بیه د ډبرو سکرو د وېش لړۍ پیل کړې ده. د دغه اژانس په اېکس پاڼه لیکل شوي، چې دغه کار ښاریانو ته د اسانتیاوو رامنځته کولو په موخه شوی دی.
په دغه خبر کې د طالبانو تر واک لاندې د دولتي شرکتونو د عمومي مشر احمدجان بلال له قوله لیکل شوي، چې دغه کار یې د شمال د ډبرو سکرو شرکت د اړوند ادارو له چارواکو سره په همغږۍ ترسره کړی.د هغه په وینا، د کابل ښار ټولو ناحیو ته د ډبرو سکرو لېږد روان دی چې یو ټن سکاره به په ۶۵۰۰ افغانۍ ترلاسه کړي.دغه خبر داسې مهال خپرېږي، چې تېرو وروستیو کې په پلازمېنه کې خلکو د سون توکو د لوړو بیو له امله سرټکوو.په تېرو دوو ورځو کې له کابله افغانستان انټرنشنل ته یوې سرچینې د یوې ویډیو په استولو سره ویلي و چې په کابل کې بې وزله خلک په ژمي کې د ځانونو ګرمولو لپاره په بخارۍ کې کالي، پلاستیک او ځیني نور شیان سوځوي، چې له امله یې په تېرو ورځو کې هوا ککړه شوې وه.
خو د شنونکو په وینا، طالبان تر ډېره دې ته ورته کارونه ځانته د تبلیغ لپاره کوي.
