د ملګرو ملتونو د خوړو نړۍوال پروګرام وایي، په افغانستان کې د ژمي په رارسېدو په مېلیونونو کورنۍ له کافي خوړو پرته له سختې یخنۍ سره مخامخ دي. وايي، په سږني ژمي کې به په افغانستان کې په هرو درېیو کسانو کې یو کس د خوراکي توکو له سخت کموالي سره مخ شي.
دغه پروګرام د دوشنبې په ورځ (د لېندۍ ۲۶مه) د یوې ویډیو په خپرولو سره ویلي، چې د دغو کورنیو له ډلې ډېری یې باید یو ناشونی انتخاب غوره کړي چې خپلو ماشومانو ته خواړه برابر کړي که یې ګرم وساتي.
دغه پروګرام تر دې وړاندې هم ویلي و، چې په سږني ژمي کې به په افغانستان کې په هرو درېیو کسانو کې یو کس د خوراکي توکو له سخت خوندیتوب سره مخ شي ځکه چې دغه هېواد د لوږې له بېړنۍ کچې سره مخامخ دی.
د خوړو نړۍوال پروګرام او د ماشومانو د ساتنې ادارې د وړاندوینو له مخې، ماشومان به په ځانګړې توګه په راتلونکو درېیو میاشتو کې د ژوندي پاتې کېدو له سختو شرایطو سره مخ شي.
دغه پروګرام اټکل کړی و، چې نږدې ۱۵ مېلیونه خلک یا د افغانستان نږدې درېیمه برخه د ژوندي پاتې کېدو لپاره خوراکي مرستو ته اړتیا ولري او نږدې ۶.۵ مېلیونه ماشومان، یا ۳۰ سلنه خلک د لوږې له بېړنۍ کچې سره مخ دي.
