د شرعیاتو او اسلامي ثقافت استادانو د طالبانو د لوړو زده کړو وزارت له خوا د دغه پوهنځي د یو شمېر استادانو پر منفک کېدو نیوکه وکړه او وایي، چې دغه وزارت د اکاډمیکو اصولو خلاف استادانو ته د سویې د تثبیت په موخه علمي-تخصصي کنفرانس جوړوي.
دوی د یوه پرانیستي لیک په ترڅ کې په طالبانو نیوکه کړې، چې اوسمهال هم د هېواد په ځینو پوهنتونو کې د شرعیاتو د پوهنځي د استادانو د منفک کېدو بهیر روان دی.
په دغه لیک کې راغلي: «د استادانو د سویې د تثبیت پروسه د مولوي صاحبانو تر څار لاندې په داسې حال کېږي، چې دغه استادان د کلونو تدریس تجربه لري.»
د یاد پوهنځي استادان زیاتوي، چې دغه بهیر د متخصصو استادانو د منفک کولو لپاره یوه پلمه ده او پر طالبانو تور پورې کوي، چې دوی غواړي د دیني مدرسو فارغان د تدریس لپاره وګوماري.
د دوی په خبره، طالبان د شرعیاتو په پوهنځي کې داسې کسان ګوماري، چې د پوهنتونونو او د لوړو زده کړو د موسسو له علمي او اکاډمیکو اصولو سره اشنایي نه لري.
د شرعیاتو او اسلامي ثقافت استادان خبرداری ورکوي، چې که د متخصصو استادانو د منفک کېدو بهیر دوام وکړي، د پوهنتونونو د علمي استقلالیت او روزنیز بهیر د کیفیت د ټېټېدو لامل کېږي.
یادو استادانو په دغه پرانیستي لیک کې زیاته کړې ده، چې د طالبانو دغه اقدام به د هېواد د لوړو زده کړو پر بهیر د خلکو باور هم کم کړي.
د دغه لیک په یوه بله برخه کې راغلي، چې که طالبان د شرعیاتو د پوهنځي د استادانو د منفک کېدو بهیر ته دوام ورکړي، نو د شرعیاتو او اسلامي ثقافت ډېر کدرونه به هېواد پرېږدي او د نظام پر خلاف به موقف ونیسي.
د شرعیاتو او اسلامي ثقافت استادان وایي، چې دوی د تېر حکومت پرمهال د نرم افزار قدرت په توګه «د استعمار» پروړاندې کار کاوه، چې اوسمهال د همدې کسانو د رشخند او پيغور وړ ګرځېدلي دي.
دوی وایي، چې که د یاد پوهنځي استادان د کوم جرم له امله لرې کېږي، نو باید جرم یې د عدلي او قضایي ادارو له خوا ثابت شي، که نه نو ناوړه پایلې به ولري.
یاد استادان له طالبانو غواړي، چې د شرعیاتو د پوهنځي د پخوانیو استادانو له لرې کولو ډډه وکړي.
د افغانستان د شرعیاتو او اسلامي ثقافت استادان په داسې حال کې په طالبانو دغه نیوکه کوي، چې طالبانو تازه د کونړ او کابل پولي تخنیک پوهنتون ۱۲ د شرعیاتو، دوه د زراعت او دوه د ښوونې او روزنې پوهنځي استادان د سلفي مسلک له امله منفک کړي دي.
له کونړ پوهنتون څخه یوه استاد د نوم نه ښودلو په شرط افغانستان انټرنشنل - پښتو ته وویل چې تازه د یوه مکتوب پر بنسټ د طالبانو تر کنټرول لاندې د لوړو زده کړو وزارت ۱۲ استادان منفک کړي دي.
دغه استاد وايي چې په منفک شویو استادانو کې ۸ تنه د شرعیاتو پوهنځي، دوه د ښوونې او روزنې او دوه د زراعت پوهنځي استادان دي.
له دې سره، د طالبانو تر کنټرول لاندې د لوړو زده کړو وزارت یوې سرچینې افغانستان انټرنشنل - پښتو ته ویلي، چې د وزارت د رهبرۍ په کچه تصمیم نیول شوی چې له پوهنتونونو وهابي استادان منفک او پر ځای یې نوي د طالبي فکر استادان وګوماري.
د یادولو ده، چې پر افغانستان د طالبانو له واکمنېدو وروسته له هېواد څخه سلګونه استادان وتلي، چې دغې مسلې د هېواد روزنیز بهیر ډېر اغېزمن کړی دی.
