طالبان: په پروان ولایت کې پنځه تنه کوډګر نیول شوي دي
د طالبانو د امر بالمعروف او نهې عن المنکر وزارت وایي، چې د دغه وزارت محتسبینو په تېرې یوې اونۍ کې پنځه کوډګر نیولي دي.
د طالبانو د امر بالمعروف او نهې عن المنکر وزارت وایي، چې د دغه وزارت محتسبینو په تېرې یوې اونۍ کې پنځه کوډګر نیولي دي.
دغه وزارت د سې شنبې په ورځ (د لېندۍ ۲۷مه) پر اېکس پاڼه لیکلي، چې د دغو نیول شویو کوډګرو په ډله کې ډېری یې ښځینه کوډګرې دي.
دغه وزارت وایي، چې دغه کوډګر تر نیول کېدو وروسته محکمو ته ورپېژندل شوي دي.
تر دې وړاندې (د لېندۍ په ۱۹مه) هم د طالبانو د امر بالمعروف او نهې عن المنکر وزارت په بلخ او سمنګان ولایتونو کې د دوو کوډګرو له نیول کېدو خبر ورکړی و.
په لېندۍ میاشت کې د دغه وزارت لهخوا د خپرو شویو مالوماتو له مخې، د افغانستان په بېلابېلو ولایتونو کې ۱۸ کوډګر نیول شوي دي.
په افغانستان کې د کوډګرو د نیونې لړۍ له هغه وروسته پیل شوه، چې د طالبانو د امر بالمعروف او نهې عن المنکر وزارت اعلان وکړ چې په ټول افغانستان کې یې د تعویذ لیکنې او کوډګرۍ پر کاروبار بندیز لګولی دی.
د دغه وزارت ویاند محمد صادق عاکف په خپل یو بیان کې ویلي و، چې په «شریعت» کې د کوډګرو او ساحرانو وژلو ته جواز ورکړل شوی او دوی په هیڅ ډول کوډګرۍ ته اجازه نه ورکوي.
