خوړو نړۍوال پروګرام: د راتلونکو ۶ میاشتو لپاره ۷۱۸ مېلیون ډالرو بېړنۍ مرستې ته اړتیا لرو
د خوړو نړۍوال پروګرام وایي، په افغانستان کې نږدې ۱۵ مېلیونه خلک نه پوهېږي چې خپل راتلونکي خواړه له کومه کړي.
د خوړو نړۍوال پروګرام وایي، په افغانستان کې نږدې ۱۵ مېلیونه خلک نه پوهېږي چې خپل راتلونکي خواړه له کومه کړي.
دغه پروګرام د سې شنبې په ورځ (د لېندۍ ۲۷مه) پر اېکس پاڼه په افغانستان کې د خپلو فعالیتونو د دوام لپاره د بېړنۍ مرستې غوښتنه کړې ده.
په دغه لیکنه کې راغلي: «د راتلونکو شپږو میاشتو فعالیتونو د دوام لپاره ۷۱۸ مېلیون ډالرو بېړنۍ مرستې ته اړتیا لرو.»
دغه پروګرام تېره ورځ هم ویلي و، چې په افغانستان کې د ژمي په رارسېدو په مېلیونونو کورنۍ له کافي خوړو پرته له سختې یخنۍ سره هم مخامخ دي.
دغه پروګرام پر اېکس پاڼه لیکلي و، چې سږنی ژمی به په افغانستان کې د هرو درېیو کسانو له ډلې یو کس یې د خوراکي توکو له سخت کموالي سره مخ شي.
دغه پروګرام تر دې وړاندې هم اټکل کړی و، چې نږدې ۱۵ مېلیونه خلک یا د افغانستان نږدې درېیمه برخه د ژوندي پاتې کېدو لپاره خوراکي مرستو ته اړتیا لري او نږدې ۶.۵ مېلیونه ماشومان، یا ۳۰ سلنه خلک د لوږې له بېړنۍ کچې سره مخامخ دي.
