د القاعدې دوو ډلو جماعت القضات الجهاد او د عرب ټاپوزمې غړو په جلا - جلا پېغامونو کې د طالبانو د کډوالو او بېرته راستنېدونکو چارو وزیر وژنه غندلې او په داعش ډلې یې د نیوکې ترڅنګ ویلي، دغه ډله د اسراییلو سره د جګړې په ځای په افغانستان کې له طالبانو سره په جګړه بوخته ده.
خلیل الرحمان حقاني چې د حقاني شبکې یو له مهمو مشرانو څخه و، تېره اوونۍ په کابل کې د مهاجرینو په وزارت کې د یوه ځانمرګي بریدګر له خوا ووژل شو.
د حقاني د وژنې مسووليت د داعش خراسان څانګې پر غاړه اخيستی.د سې شنبه په ورځ په پښتو ژبه په یوه پیغام کې جماعت القضات الجهاد خلیل الرحمان حقاني "لوی مجاهد" بللی دی او دغې ډلې په خپله اعلامیه کې د طالبانو د مشر حقاني پر مړینې خواشیني ښودلې ده.په عرب ټاپووزمه کې د القاعدې بلې څانګې بیا په جلا بیان کې خلیل الرحمان حقاني "د جهاد یو له ثابتو غرونو" څخه بللی او ویلي یې دي: "هغه د یوې اصلي جهادي کورنۍ څخه و، چې د دوی ملګری و. شېخ جلال الدین حقاني د جهاد په لاره روان وو او نن یې ژوند په خیر پای ته ورسېد او د اشغالګرو پر وړاندې له لسیزو جهاد او استقامت وروسته په شهادت ورسېد».په عربي ټاپووزمه کې د القاعدې سازمان د القاعدې یوه څانګه ده، چې په ځانګړي ډول په یمن او سعودي عربستان کې فعالیت کوي.دغه سازمان ویلي: "د داعش پر وړاندې شرعي دنده د هغوی وژل او له منځه وړل دي، ځکه دا یو لوی شر او لوی ناورین دی."په خبرپاڼه کې د حقاني له کورنۍ سره خواخوږي څرګنده شوې ده.یاده دې وي، چې د القاعدې مشر ایمن الظواهري په ۲۰۲۲ کال کې په کابل کې د طالبانو د کورنیو چارو د وزیر سراج الدین حقاني په مېلمستون کې ووژل شو او دا د دې ښکارندویي کوي، چې د حقاني شبکه له القاعدې سره نږدې اړیکې لري.همدا ډول د ملګرو ملتونو د امنیت شورا د راپور پر بنسټ، طالبانو له القاعدې سره خپل اتحاد او همکارۍ ته دوام ورکړی دی.د دغه راپور له مخې، القاعده په افغانستان کې خپلې اته اډې بېرته فعالې کړې دي.
