حماس: په غزه کې د اوربند تړون شونی دی، چې اسراییل نوي شرطونه وړاندې نه کړي
حماس وايي، که اسراييل د نويو شرايطو له وضعه کولو ډډه وکړي؛ نو په غزه کې د اوربند تړون شونی دی.
حماس وايي، که اسراييل د نويو شرايطو له وضعه کولو ډډه وکړي؛ نو په غزه کې د اوربند تړون شونی دی.
حماس په یوه بیان کې ویلي، چې په غزه کې د اوربند او د بندیانو تبادله ممکنه ده؛ که چیرې اسراییل د نویو شرطونو له لګولو لاس په سر شي.
دغې ډلې په خپله اعلامیه کې د اوربند خبرې اترې جدي او مثبتې بللې دي.
تر دې وړاندې رویټرز د خپلو سرچېنو په حواله خبر ورکړی و، چې په راتلونکو ورځو کې به د اوربند په اړه یو تړون لاسلیک شي.
له بله پلوه د اسراییل لومړی وزیر بنیامین نتنیاهو د غزې د اوربند په اړه د خبرو لپاره مصر ته رسېدلی دی.
دا رنګه د غزې په شمال کې د جبالیه، بیت حنون او بیت لاهیه سیمو کې د اسراییلي پوځ بریدونه دوام لري.
یوازې په تېرو ۲۴ ساعتونو د اسراییل په بریدونو کې تر ۵۰ ډېر فلسطینیان وژل شوي دي.
هاخوا بیا د ملګرو ملتونو د بشري مرستو د همغږۍ اداره «اوچا» وايي، د ملګرو ملتونو ادارې د اکتوبر له شپږمې راهیسې د ډسمبر تر ۱۵مې پورې په غزه کې د اسراییلي ځواکونو لهخوا پر ښوونځیو ۹۵ بریدونه مستند کړي دي.
د اوکراین ولسمشر ولادیمیر زېلېنسکي ویلي، چې د پولنډ له لومړي وزیر ډونالډ تسک سره یې کتلي دي.
په دغه کتنه کې دواړو هېوادونو د اړیکو په ثبات خوښي څرګنده کړې ده.
زېلېنسکي ویلي؛ خوښ دی چې اړېکې یې په داسې ستونزمنو حالاتو کې ثبات لري.
زېلېنسکي وویل: «په راتلونکي کال کې به پولنډ د اروپايي ټولنې د شورا مشري په غاړه ولري. دا مشري کولی، شي موږ ته د اروپايي اتحادیې د غړیتوب په لور د پام وړ پرمختګ راولي.»
په دې کتنه کې د اوکراین ولسمشر د پولنډ څخه مننه کړې چې په ناټو کې د بشپړ غړیتوب لپاره یې د دوی ملاټړ وکړ.
زېلېنسکي وویل: « زه د پولنډ څخه مننه کوم چې د ناټو د بشپړ غړیتوب لپاره یې له موږ څخه ملاټړ وکړ او ژر تر ژره یې په اتحاد کې د شاملېدو بلنه ترلاسه کړه. پولنډ پوهېږي چې دا زموږ د اروپایي برخې لپاره څومره مهم دی چې ریښتیني امنیت تضمین کړي.»
همدا راز، ښاغلي ډونالډ ټسک وویل: «اوس د دې وخت دی چې ټول لوېدیځ په خپل ځواک، امکاناتو او خپل توان باور ولري، چې د دې سترې لوبې ټولو لوبغاړو ته قناعت ورکړي، چې اوکراین او ټوله نړۍ یوازې د سولې او ځمکنۍ بشپړتیا او سرحدونو د درناوي مستحق دي.»
زېلېنسکي وویل، چې په دې کتنه کې یې د جګړې په ډګر او ډیپلوماسۍ ډواړو مفصلې خبرې وکړې. هغه زیاته کړه، چې موږ د اوکراین په اړه ګډ لید لوری لرو: «اوکراین عادلانه سولې ته اړتیا لري، باید قوي وي او نور ځواکمنتیا ته اړتیا لري.»
بل خوا، دا چې پولنډ د روسیې پر وړاندې د لوېدیځ متحدینو په لومړۍ کرښه کې ولاړ دی او د اوکراین جګړو کې د روسیې د پراختیایي سیاستونو مخنیوي لپاره مهم رول لوبوي، نو روسیه د پولنډ پر وړاندې یو سخت دریځ لري.
