د پاکستان د اطلاعاتو پخواني وزیر فواد چوهدري عمران خان سره په اډیاله زندان کې د لیدنې پر مهال ویلي، چې تحریک انصاف دې د افرادو پر ځای پر مسلو غور وکړي او له پوځ او د پاکستان حکومت له مشرتابه سره دې ترینګلتیا کمه کړي.
فواد چوهدري وایي، په دغې لیدنه کې یې عمران خان ته ويلي چې د افرادو او پوځ پر ځای دې پر لویو مسلو غور وکړي او د مشرتابه سره د تربګنیو په کمولو سره دې د تحریک انصاف ګوند لپاره په سیاسي ډګر کې قانوني ځای ترلاسه کړي.
فواد چوهدري هیله څرګنده کړې، چې عمران خان به د ده مشورې ته مثبت ځواب ووایي.
هفه زیاته کړې، چې د عمران خان سره به د روانې مياشتې په ۱۹مه نېټه یو وار بیا وګوري او په دې برخه كې به د هغه د هڅولو لپاره خپلو هلو ځلو ته دوام ورکړي.
فواد چوهدري چې هغه هم د تحریک انصاف یو پخوانی غړی دی، له عمران خان څخه وروسته نیول شوی او بندي شوی و او له څه مودې بندي کېدو وروسته بېرته خوشې شوی و.
تر دې وړاندې په سیاسي چارو کې د پاکستان د لومړي وزیر سلاکار رانا ثناالله تېره ورځ وېلي و، چې عمران خان پخوا د سیاسي خبرو پلوی و او اوس د خبرو له پاره لېوالتیا نه لري.
هغه ویلي و، د تحريک انصاف او حکومت ترمنځ په مذاکراتو کې تر ټولو لوی خنډ په خپله عمران خان دی.
د اوکراین ولسمشر ولادیمیر زېلېنسکي ویلي، چې د پولنډ له لومړي وزیر ډونالډ تسک سره یې کتلي دي.
په دغه کتنه کې دواړو هېوادونو د اړیکو په ثبات خوښي څرګنده کړې ده.
زېلېنسکي ویلي؛ خوښ دی چې اړېکې یې په داسې ستونزمنو حالاتو کې ثبات لري.
زېلېنسکي وویل: «په راتلونکي کال کې به پولنډ د اروپايي ټولنې د شورا مشري په غاړه ولري. دا مشري کولی، شي موږ ته د اروپايي اتحادیې د غړیتوب په لور د پام وړ پرمختګ راولي.»
په دې کتنه کې د اوکراین ولسمشر د پولنډ څخه مننه کړې چې په ناټو کې د بشپړ غړیتوب لپاره یې د دوی ملاټړ وکړ.
زېلېنسکي وویل: « زه د پولنډ څخه مننه کوم چې د ناټو د بشپړ غړیتوب لپاره یې له موږ څخه ملاټړ وکړ او ژر تر ژره یې په اتحاد کې د شاملېدو بلنه ترلاسه کړه. پولنډ پوهېږي چې دا زموږ د اروپایي برخې لپاره څومره مهم دی چې ریښتیني امنیت تضمین کړي.»
همدا راز، ښاغلي ډونالډ ټسک وویل: «اوس د دې وخت دی چې ټول لوېدیځ په خپل ځواک، امکاناتو او خپل توان باور ولري، چې د دې سترې لوبې ټولو لوبغاړو ته قناعت ورکړي، چې اوکراین او ټوله نړۍ یوازې د سولې او ځمکنۍ بشپړتیا او سرحدونو د درناوي مستحق دي.»
زېلېنسکي وویل، چې په دې کتنه کې یې د جګړې په ډګر او ډیپلوماسۍ ډواړو مفصلې خبرې وکړې. هغه زیاته کړه، چې موږ د اوکراین په اړه ګډ لید لوری لرو: «اوکراین عادلانه سولې ته اړتیا لري، باید قوي وي او نور ځواکمنتیا ته اړتیا لري.»
بل خوا، دا چې پولنډ د روسیې پر وړاندې د لوېدیځ متحدینو په لومړۍ کرښه کې ولاړ دی او د اوکراین جګړو کې د روسیې د پراختیایي سیاستونو مخنیوي لپاره مهم رول لوبوي، نو روسیه د پولنډ پر وړاندې یو سخت دریځ لري.
