د پروان لپاره د طالبانو د امنیه قوماندانۍ ویاند ویلي، تېره ورځ ناوخته په سوېلي سالنګ کې له سړکه د یوه موټر د اوښتو په پېښه کې دوه تنه مړه او درې نور سخت ټپیان شوي چې روغتیايي حالت یې د اندېښنې وړ دی.
د پروان لپاره د طالبانو د امنیې قوماندانۍ ویاند فضل رحیم مسکین یار وايي، دغه پېښه تېره ورځ ناوخته رامنځته شوې، چې له امله یې د موټر چلوونکي په ګډون دوه تنه مړه شوي او درې نور سخت ټپیان دي.
تېره ورځ افغانستان انټرنشنل ته له سیمې یوه اوسیدونکي په یوه ویډیو پیغام کې ویلي، چې په دغې پېښه څلور تنه مړه شوي او یو ټپی دی.
مسکین یار وايي، دغه پېښه د موټر د ګړندي تګ او موټر چلوونکي د بې پامۍ له امله رامنځته شوې ده.
ویل کیږي، چې د دغې پېښې ټپيان د درملنې لپاره روغتون ته وړل شوي او روغتیايي حالت یې ډاډمن نه دی.
د طالبانو ټرانسپورت وزارت د میرویس نیکه او مومند بابا په نوم هغه ټرانسپورټي شرکتونه تړلي، چې وړمه شپه يې اړوندو موټرو د کابل – کندهار پر لویه لار مرګوني ټکرونه کړي.
د طالبانو ویاند ذبیح الله مجاهد تېره ورځ د یوې خبرپاڼې په خپرولو سره ویلي، چې په دې پېښه کې ۵۲ کسان مړه او ۶۵ نور ټپيان شوي دي.
په هغو ویډیو ګانو او انځورونو کې چې افغانستان انټرنشنل ته رسیدلي ښکاري چې د لویو لارو د سورلۍ لوی بسونه ویجاړ شوي پراته او په وینو کې لت پت پراته ټپیان زګېروي کوي.
د موتر چلوونکو بې احتیاطي، ګړندی تګ، د چپ لاس موټر، کندې کپر سړکونه او ټرافیکي اصولو ته نه پاملرنه هغه ټکي دي چې نن سبا په افغانستان کې د ټرافیکي پېښو د ډېرېدو لامل شوې دي.
