د افغانستان د وروستي جمهوري دولت پخوانی د ملي امنیت رییس احمد ضیا سراج د طالبانو له لورې د رحمدل حنفي د مېرمن د نیولو په غبرګون کې وویل، چې دوی سره دا معلومات و چې د ملا اختر محمد منصور مېرمن په کابل کې چیرته وه، مګر دوی بندي نه کړه.
د افغانستان د وروستي جمهوري دولت د پخواني ولسمشر محمد اشرف غني مخکیني ساتونکي رحمدل حنفي د یکشنبې په ورځ (د لېندۍ ۲۵مه) په کابل کې وروسته له هغه ځان وواژه چې طالبانو یې مېرمن ونیوله.
د طالبانو دغې چارې ته احمد ضیا سراج پر اېکس پاڼې لیکلي، چې د ۱۳۹۷ هجري لمریز کال په پای کې مو د علاوالدین څلور لاري په سیمه کې د اختر منصور د دویمې مېرمنې د استوګنې په اړه معلومات تر لاسه کړل خو افغاني دود او قانون اجازه رانه کړه چې وه یې نیسو.
سراج وویل: «که څه هم د هغې مېړه، د طالبانو د ډلې د مشر په توګه، په افغانستان کې د لوی شمېر بې ګناه خلکو په وژنه کې ښکیل و، د هېواد د قانون په پلي کولو چې جرم یې فردي عمل ګڼلی و او زموږ د خلکو د ارزښتونو او دودونو په نظر کې نیولو سره، چې پرته له ثبوت او شواهدو د یوې مېرمنې نیول یې عیب ګنلو، د هغې له نیولو منصرفه شوو».
سراج په افغانستان کې د طالبانو واکمنۍ او د قانون نه شتون ته په غبرګون کې لیکلي چې ملي ارزښتونه، دودونه او افغاني وجدان ته په نه درناوي یاده ډله خپله اصلي څېره خلکو ته په ډاګه کوي چې خپل ژوند پرې رالنډ کړي.
رحمدل حنفي ۹ اولادونه لري. سرچینې وايي، چې د خپلې مېرمنې د موندلو او خلاصون لپاره یې د طالبانو مختلفو ادارو ته مراجعه کړې وه، خو کوم ځواب یې نه و ترلاسه کړی.
سرچینه زیاتوي، چې د رحمدل حنفي د مېرمنې برخلیک لا هم څرګند نه دی او دا هم نه ده مالومه، چې چېرې لېږدول شوې ده.
طالبانو تر اوسه په دې اړه څه نه دي ويلي، خو دې ډلې له دې وړاندې هم يو شمېر پخواني افغان سرتېري او چارواکي او يا د هغوى د کورنيو غړي نيولي دي.
