د حزب اسلامي د مشر ګلبدین حکمتیار د لمسي عبدالله بهیر مېرمن عایشه جهانګیر د دویچه ویله سره د (لیندۍ ۲۸مه) په یوې ځانګړې مرکه کې د افغانستان پر دغه جهادي څیرې یو شمېر توندې نیوکې کړې دي.
نوموړې ګلبدین حکمتیار ته د راکټیار په خطاب سره وايي، چې له هغه سره د هېڅ ډول اړیکو لېوالتیا نه لري، ځکه د ښځو پر مخ د تېزاب شیندلو مخینه لري او خبریالان یې هم وژلي دي.
عایشه زیاتوي: «د حکمتیار له ما سره هېڅ ډول رابطه نه شته، هغه کس به له ما سره څه رابطه ولري چې د پوهنتون مخې ته یې د ښځو پر مخونو تېزاب شیندل او یا یې خبریالان وژلي دي.»
د عایشې په خبره، ګلبدین حکمتیار د افراطیت پر یوې داسې ناروغۍ اخته دی چې د دین په نوم یې د ښځو حقونه پایمال کړي او دا د دغه ډول کړنو پر ضد مبارزه کوي.
د هغې په خبره: «زه د حکمتیار افراطي فکر ته مرض وایم او زه د داسې مرضونو په علاج لګیا یم.»
عایشه جهانګیر ګلبدین حکمتیار ځکه دوه مخې څېره بولي چې پر خپلو لوڼو یې لوړې زده کړې کړي ؛خو یو مهال یې د نجونو د زده کړو مخنیوی او مخالفت کاوه.
عایشې جهانګیر د ژورنالېزم په برخه کې لوړې زده کړې کړي چې اوسمهال په اسټرالیا کې د پوهنتون استاده ده.
عایشې د ګلبدین حکمتیار د زوم او پخواني ویاند غیرت بهیر له زوی عبدالله بهیر سره د اسټرالیا په یوه پوهنتون کې اشنا شوې او بیا یې په ۲۰۱۶ میلادي کال کې د هغه د کورنۍ د مخالفتونو باوجود ورسره واده وکړ.
هغې په پاکستان کې د خبریالۍ تر څنګ په یاد هېواد کې د افغان کډوالو پر ژوند یو کتاب هم لیکلی دی.
عبدالله بهیر هم په بېلابېلو مرکو کې خپل نیکه ته د جنګسالار تر څنګ د قاتل خطاب کړی او حتی هغه یې د افغانستان د کورنیو جګړو پر مهال د ویجاړیو یو له اصلي لاملینو څخه ګڼلی دی.
د حزب اسلامي مشر ګلبدین حکمتیار د پخواني جمهوري نظام پر مهال د حکومت او بهرنیو پوځیانو خلاف د طالبانو په څیر په جګړه بوخت و ؛خو د جمهوریت په وروستیو کلونو کې د سولې بهیر سره یو ځای شو.
هغه اوسمهال د خپل پخواني فکر برعکس د نجونو د زده کړو اړوند د طالبانو بندیزونه غندلي او پر وړاندې یې ننګوونکی دریځ خپل کړی دی.
