حامد کرزي یو ځلې بیا له طالبانو وغوښتل چې د نجونو لپاره دې د تعلیمي ادارو دروازې پرانیزي
د افغانستان پخواني ولسمشر حامد کرزي یو ځلې بیا له طالبانو د نجونو لپاره د ښوونځیو او پوهنځیو د خلاصولو غوښتنه کړې.
د افغانستان پخواني ولسمشر حامد کرزي یو ځلې بیا له طالبانو د نجونو لپاره د ښوونځیو او پوهنځیو د خلاصولو غوښتنه کړې.
ښاغلي کرزي نن شنبه د (مرغومې په لومړۍ نېټه) پر ایکس پاڼه دافغان نجونو د زده کړو پر ملاتړ لیکل کړي او له طالبانو یې غوښتي، چې ژر تر ژره دې د دوی پرمخ د تعلیمي ادارو دروازې پرانیزي.
حامد کرزي لیکلي چې د هېواد د ښوونځیو او پوهنتونونو د پرانېستلو لپاره د نجونو غږ تائیدوي او دا د هغوی بنسټیز حق بولي.
هغه لیکلي: «د علم او پوهې لپاره زموږ د هېواد د نجونو غوښتنه او اواز یو برحقه او د سوکاله افغانستان لپاره یو غږ دی.»
هغه زیاتوي چې د افغانستان د پرمختګ او ښیرازۍ لپاره زده کړې اړینې دي.
کرزي تر دې پخوا هم د نجونو د زده کړو په ملاتړ په وار، وار څرګندونې کړي دي؛ خو پر افغانستان واکمنو طالبانو د دغه پخواني ولسمشر او د نړیوالې ټولنې په خبرو چندانې غوږ نه دی ګرولی.
تر دې ورهاخوا د په متحده عربي اماراتو کې مېشت دافغانستان پخواني واکمن محمد اشرف غني هم له طالبانو څخه ورته غوښتنې کړي؛ خو نه یوازې دا چې منل شوي نه دي، بلکې طالبانو پر نجونو او ښځو له دې غوښتنو سره، سره خپل افراطي بندیزونه لا ډېر کړي دي.
د افغانستان د پولیو له منځه وړلو بېړني عملیاتي مرکز اعلان کړی، چې د هېواد په بېلابېلو سیمو کې به د راتلونکې دوشنبې پر ورځ د ګوزڼ واکسین دغه کمپاین پیل شي چې درې ورځې به دوام وکړی.
د ګوزڼ یا د ماشومانو د فلج نړیوال بنسټ په خپل وروستي راپور کې ویلي چې په افغانستان کې د روان کال په ترڅ کې تر اوسه د پولیو ۲۳ مثبتې پیښې ثبتې شوي، چې ډېرې هغه یې په ننګرهار ولایت کې دي.
په هېواد کې د ګوزڼ واکسین په اړه د عامه پوهاوي نشتوالي او ناسم کولتوري روایتونه چې له مخې یې کورنۍ کوچنیان نه واکسین کوي د دغو پیښو د ډیریدو لاملونه بلل کېږي.
د غزني ولایت اوسیدونکی عطا محمد چې دوه وروڼه یې د ګوزڼ پر ناروغۍ اخته دي اوسمهال د پولیو په رضاکارانه فعالیتونو بوخت دی او په لرې پرتو سیمو کې خلکو ته د ګوزڼ واکسینو د ګټور په اړه عامه پوهاوی ورکوي.
هغه وایي، چې د ده مور او پلار واکسینو ته هېڅ ډول ارزښت نه ورکاوه چې اوس یې موږ خورا ستره بیه پرې کوو.
عطا محمد د ګوزڼ واکسین د عامه پوهاوي کمپاین پر مهال له یو شمېر کولتوري ننګونو سره مخ شوی دی او له ډېرو داسې خلکو سره مخ شوی چې خپلو اولادونو ته یې د واکسین د څاڅکو ورکولو څخه انکار کړی دی.
هغه زیاتوي: «یو پلار تل د خپلو اولادونو له واکسین انکار کاوه، بیا مې خپل کور ته راوست چې زما دوه فلج شوي وروڼه وګوري او تر هغې وروسته یې فیصله وکړه چې خپل اولادونو ته د واکسین څاڅکي ورکړي.»
د عطا محمد پلار ۵۸ کلن محمد رمضان په وینا؛ د یوه پلار په توګه د خپلو دوو ګوزڼ ځپلیو اولادونو د راتلونکي لپاره خورا ډېر اندیښمن دی او پښیماني ښیې چې پر وخت یې زامن واکسین کړي نه دي.
محمد رمضان وویل: «دا دوه فلج شوي زامن مې په ډېرو ډاکټرانو وګرځول؛ خو هر یو راته اوس همدا وایي چې درملنه یې امکان نه لري.»
د راپورونو له مخې په کندهار ولایت کې د طالبانو مشر ملا هبت الله د خوندیتوب لپاره د واکیسن پر کمپاین بندیز لګولی چې له مخې یې ماشومان له دغو څاڅکو بې برخې پاتې کېږي.
د شمېرو له مخې د روان میلادي کال په اکټوبر میاشت کې په کندهار ولایت کې د پولیو یوه مثبته پېښه هم ثبت شوې ده.
د افغانستان په ګاونډ پاکستان کې هم سږ کال د پولیو پر ناروغۍ د اخته شویو کسانو شمېر یو ځل بیا ډېر شوی او په روان کال کې هلته ۶۴ مثبتې پیښې ثبتې شوي دي.
د هېواد په ختیځو ولایتونو کې د مثبتو پيښو د کچې لوړوالي یو لامل هم ګاونډي هېواد پاکستان تګ راتګ او تازه راستنیدونکي کډوال ښودل شوي دي.
په دې وروستیو کلونو کې د ګوزڼ ناروغي په ډېرو هېوادونو کې له منځه تللې؛ خو افغانستان او پاکستان لا هم د دغې ناروغۍ لپاره خطرناکې سیمې بلل کېږي.
ګوزڼ (پولیو) یوه ویروسي ناروغي ده چې د کوچنیانو عصبي سیسټم ته زیان رسوي او د فلج سبب کېږي. دا ناروغي له ماشومانو پرته په لویانو ته هم لېږدیدای شي؛ خو کچه یې خورا ټیټه ده. دغه ناروغي معمولا د ککړونکو موادو د لیږد له لارې رامنځته کېږي.
