د طالبانو د کډوالو چارو وزارت: د پاکستان له زندانونو ۵۳ تنه افغانان خوشې شوي دي
د طالبانو د کډوالو او بېرته راستنېدونکو چارو وزارت وایي، چې د پاکستان له زندانونو ٥٣ تنه افغان بندیان خوشې شوي دي.
د طالبانو د کډوالو او بېرته راستنېدونکو چارو وزارت وایي، چې د پاکستان له زندانونو ٥٣ تنه افغان بندیان خوشې شوي دي.
دغه وزارت پر اېکس پاڼه لیکلي، چې دغه کسان تر خوشې کېدو وروسته بېرته افغانستان ته ستانه کړای شوي دي.
په سپین بولدک کې د طالبانو د سرحدي امریت د معلوماتو له مخې، دغه کسان وړمه ورځ د پاکستان له زندانونو تر خوشې کېدو وروسته د سپین بولدک له لارې راستانه شوي، چې ٤٥ یې انفرادي کسان ول او ٨ تنه یې بیا د یوې کورنۍ غړي وو.
دغه وزارت د دغو خوشې شویو بندیانو د جرم او د بند د مودې په اړه بیا څه نه دي ویلي.
د دغه وزارت په وینا، دغه ستانه شوي کسان تر پېژندلو وروسته د مرستو ترلاسه کولو په موخه ځینو بنسټونو ته هم ورپېژندل شوي دي.
تر دې دوه ورځې وړاندې هم د طالبانو تر واک لاندې باختر اژانس راپور ورکړی و، چې د پاکستان له زندانونو ۱۲ تنه افغان بندیان خوشې شوي دي.
له هغه وړاندې هم د طالبانو د کډوالو چارو وزارت (د لېندۍ په ۱۵مه نېټه) ویلي و، چې پاکستاني پولیسو په دې وروستيو کې د تحریک انصاف په لاريونونو کې د ګډون په تور شاوخوا ۸۰۰ افغان کډوال نيولي او بندیان کړي یې دي.
طالبانو زياته کړې وه، چې په دغو لاريونونو کې افغانانو ګډون نه لاره؛ خو پاکستاني پوليس د افغان کډوالو ځورولو ته دوام ورکوي.
خو لاتراوسه د دغو ۸۰۰ کسانو د برخلیک په اړه څه نه دي ویل شوي.
