په کابل کې د ( مرغومې ۴مه) د طالبانو تر واک لاندې د کانونو او پیټرولیم وزارت په یوې غونډه کې چې د دغې ډلې اقتصادي مرستیال ملا عبدالغني برادر هم په کې برخه لرله، د ۱۴۵ میلونه ډالرو په ارزښت د لوګر د سېمنټو فابریکې تړون لاسلیک کړ.
د طالبانو د کانونو او پېټرولیم وزارت وزیر ملا هدایت الله بدري په وینا؛ دا تړون د راتلونکو دېرش کلونو لپاره شوی چې د افغان ساکو شرکت به د ۱۴۵ میلونه ډالرو په پانګونې سره په یاده فابریکه کې هره ورځ ۲۵۰۰ ټنه سېمنټ تولید کړي.طالبان په دې باور دي چې د دغې پروژې له لارې به سلګونه کسانو ته د سېمنټو د تولید په برخه کې د کار کولو زمینه برابره شي.د رسمي معلوماتو له مخې طالبانو تر اوسه د ۶۲۳ میلونه ډالرو په ارزښت د سېمنټو د څلورو بېلابېلو پروژو تړونونه لاسلیک کړي ؛خو هېڅ عملي اقدام پرې نه دی شوی.نیوکې دا دي چې طالبان د خپلو تبلیغاتو لپاره د رسنیو په وړاندې دغه ډول تړونونه لاسلیکوي ؛خو په عملي توګه یې د پیل کیدو هېڅ راز شواهد نه لیدل کیږي.د طالبانو سره دغه ډول تړونونه د بهرنیو شرکتونو له لوري کېږي چې د افغانستان دننه د پروژو هېڅ ډول مخینه نه لري او ډېری یې نوي رامنځته شوي دي.د کانونو او پېټرولیم وزارت یوې سرچینې ویلي چې دغه ډول تړونونه باید د قانوني پړاوونو له بشپړیدو وروسته ازادې داوطبلۍ ته وړاندې شي؛ خو د نامالومه دلایلو له امله داسې شرکتونو سره تړونونه کېږي چې په اړونده برخو کې هېڅ ډول کاري مخینې نه لري.د سېمنټو یو کاروباري افغانستان اینټرنېشنل ته وویل، چې طالبان په غولوونکي توګه د سېمنټو د فابریکو د کار د پیلیدو خبرې کوي او دوی اړ دي چې د پاکستان په ګډون له نورو هېوادونو څخه سېمنټ را وارد کړي.په افغانستان کې د غوري، جبلسراج، یتیم تاق او د هرات د سیمنټو فابریکې د هېواد مشهورې فابریکو وې چې د تېرو جګړو پر مهال ویجاړې شوې وې چې ځنې یې بېرته رغول شوي دي؛ خو لا هم په کور دننه د سېمنټو شته اړتیاوې نه پوره کوي.
