د روسيې او تاجکستان مشران د پوځي همکاریو او په افغانستان کې د روان وضعیت پر سر خبرې کوي
د روسیې او تاجکستان ولسمشران ولادیمیر پوتین او امام علي رحمان، د سې شنبې په ورځ د (مرغومي په څلورمه) په سينټ پيټرزبورګ (لیننګراد) کې سره خبرې کوي.
د روسیې او تاجکستان ولسمشران ولادیمیر پوتین او امام علي رحمان، د سې شنبې په ورځ د (مرغومي په څلورمه) په سينټ پيټرزبورګ (لیننګراد) کې سره خبرې کوي.
د روسیې د ولسمشر مرستیال یوري اوشاکوف وایي چې په دغې لیدنه کې به په مسلکي او پوځي همکاریو او په افغانستان کې د روان وضعیت په اړه خبرې وشي.
د روسیې دولتي خبري اژانس ریانووسټي د دوشنبې په ورځ د مرغومي په درېیمه د اوشاکوف له قوله راپور ورکړی، چې کډوالي، پراختیا، سوداګري، اقتصاد او فرهنګ هغه نورې برخې دي چې دواړه ولسمشران به یې په اړه خبرې کوي.
دغه لېدنه کتنه داسې مهال ترسره کیږي چې تاجکستان د ۲۰۲۵ کال له جنورۍ وروسته به د هم ګټو خپلواکو هېوادونو د اتحادیې مشري په غاړه واخلي. په ۲۰۲۴ کال کې د دغې اتحادیې مشري روسیې کوله.
د همګټو خپلواکو هېوادونو مشر د روان کال د لړم په میاشت کې ویلي و، چې دغه ټولنه د افغانستان پولو په شاوخوا کې د امنیتي کمربند د جوړولو ملاتړ کوي. سیرګي لبدوف هیله مندي ښودلې وه چې دغه تګلاره به په سیمه کې د ترهګرو ډلو کړنې راکمې کړي.
د افغانستان په شاوخوا کې د امنیتي کمربند تګلاره د لومړي ځل لپاره د امام علي رحمان له خوا وړاندې شوه او د ۱۴۰۱ کال د تلې په میاشت کې د ټولیز امنیت د سازمان په ځانګړې ناسته کې پرې بحث وشو.
هغه مهال ښاغلي رحمان ویلي و، چې د ځینو ګواښونو د مخنیوي لپاره د افغانستان په شاوخوا سیمو کې د امنیتي کمربند جوړول اړین بریښي.
سره له دې چې د سیمې ځیني هېوادونه له طالبانو سره ښه اقتصادي او ډیپلواټیک اړیکي پالي، خو یو هېواد هم لا تر اوسه طالبان په رسمیت نه دي پېژندلي او ورسره له افغانستانه د ترهګریزو فعالیتونو په اړه اندیښمن دي.
