د پاکستان حکومت په واڼه او اعظم ورسک کې د وسلو پر ګرځولو بندیز ولګاوه
د پاکستان حکومت د سویلي وزیرستان په مرکز واڼه او اعظم ورسک کې د وسلو پر ګرځولو بندیز لګولی او خبرداری یې ورکړی چې وسله ګرځوونکي به د « خوارجو» په نامه ووژل شي.
د پاکستان حکومت د سویلي وزیرستان په مرکز واڼه او اعظم ورسک کې د وسلو پر ګرځولو بندیز لګولی او خبرداری یې ورکړی چې وسله ګرځوونکي به د « خوارجو» په نامه ووژل شي.
دغه بندیز واڼه ته د پاکستان د پوځ د لوی درستیز له سفر څو ورځې وروسته لګول کیږي.
حکومتي ادارو د واڼه او اعظم ورسک په بازارونو کې اعلانونه خپاره کړي او د وزیرستان له خلکو یې غوښتنه کړې، چې نور له وسلو سره په بازارونو کې ونه ګرځي.
په دې اعلانونو کې ویل شوي، چې « څوک په بازارونو کې له وسلې سره ولیدل شي، هغه به ترهګر او خوارج ګڼل کیږي او په همغه شیبه به وژل کیږي او حکومت به یې مسوول نه وي».
په قبایلي سیمو کې عام خلک د خپل ځان د امنیت په خاطر له اوږدو کلونو راهیسې وسلې ګرځوي او په وروستیو کې وسله یو ډول دود ګرځېدلی، خو د ضرب عضب له عملیاتو وروسته په ګڼو سیمو کې د وسلو ګرځول بند شوي.
واڼه او اعظم ورسک د احمدزي وزیرو سیمې دي، چې د پاکستاني طالبانو د غورځنګ نفوذ پکې تر مسید میشتو سیمو او شمالي وزیرستان کم دی.
