د اسراییل لومړي وزیر خبرداری ورکړی چې د یمن حوثیان دې هم د حماس او حزبالله په شان برخلیک ته په تمه شي. بنیامین نتنیاهو وویل: «لکه څنګه چې موږ د ایران د ترهګرو ډلو د مټو زور ختم کړ دغسې به د حوثیانو په وړاندې هم مبارزې ته دوام ورکړو.»
نوموړي د یکشنبې په ورځ په یوه ویډیويي پیغام کې وویل چې د حوثیانو پر ضد د اسراییل عملیات ښايي وخت ونیسي، خو پایلې به یې په سیمه کې د حماس او حزب الله په ګډون د ایران د نورو نیابتي ډلو پر ضد د اسراییل له عملیاتو سره ورته وي.
اسراییل په وروستیو میاشتو کې د ایران حکومت د نیابتي ډلو د له منځه وړلو په لټه کې دی او هڅه کوي چې په دې توګه د ایران سیمه ییز ګواښونه له منځه یوسي.
په لبنان کې د حماس او حزب الله د پام وړ کمزوري کیدو، په سوریه کې د بشارالاسد د حکومت له نسکوریدو او د تهران د سیمه ییز اغېز د کمیدو په پایله کې اسراییل اوس په یمن کې د حوثیانو پر مرکزونو باندې بریدونه په خپله اجنډا کې ځای کړې دي.
نتنیاهو د خپل ویډیویي پیغام په دوام، وویل چې اسراییل به د حوثیانو په وړاندې په خپل کمپاین کې یوازې نه وي: «متحده ایالات او نور هیوادونه، زموږ په څیر، حوثیان نه یوازې د نړۍوال لیږد رالېږد لپاره ګواښ ګڼي، بلکې د نړۍ نظم ته هم ګواښ دی.»
د امریکا د مرکزي قوماندانۍ مرکزي دفتر سنټکام د مرغومي په لومړۍ نیټه وویل چې د دغه هېواد ځواکونو په صنعا کې د ایران په ملاتړ د حوثیانو د توغندیو یو ګودام او د کنټرول او قوماندې کمپلیکس په نښه کړ.
د امریکا پوځ هم څو ځانمرګي ډرون او د حوثیانو یو د بېړۍ ضد کروز توغندی په سره سمندرګي کې ویشتلي دي.
د ایران مذهبي مشر علی خامنه ای د ۱۴۰۲ میلادی کال د لړم میاشتې په لسمه نیټه اسراییل ته د تیلو او خوراکي توکو د صادراتو د بندولو په اړتیا ټینګار وکړ او له اسلامي حکومتونو یې وغوښتل چې له اسراییل سره اقتصادی ملګرتیا ونه کړي.
د خامنه اي له څرګندونو او د حماس او اسراییل تر منځ د جګړې له شدت وروسته، حوثیانو په سور سمندرګي، باب المندب تنګي او د عدن په خلیج کې پر نړۍوالو بېړیو بریدونه پیل کړل، چې په تېرو وختونو کې یې په سیمه کې سمندري امنیت له ګواښ سره مخامخ کړ. د دغو بریدونو لړۍ ان د هند سمندر ته هم غځول شوې ده.
