سویډن کې د «پښتو میوزیک انسټیټیوټ» پرانیستل شو
مالمو ښار کې یو شمیر نامتو افغان فرهنګیانو، لیکوالانو او سندرغاړو د پښتو میوزک انسټیټیوټ پرانیست. دغه ګام په افغانستان کې پر موسیقۍ د طالبانو له درې کلن بندیز وروسته دی.
مالمو ښار کې یو شمیر نامتو افغان فرهنګیانو، لیکوالانو او سندرغاړو د پښتو میوزک انسټیټیوټ پرانیست. دغه ګام په افغانستان کې پر موسیقۍ د طالبانو له درې کلن بندیز وروسته دی.
د انسټیټیوټ په پرانیست غونډه کې ځینو افغان لیکوالانو او شاعرانو پښتو موسيقۍ او هنرمندانو ته ورپېښې ستونزې په ګوته او د حل لپاره يې سپارښتنې وړاندې کړې.
د دوی له ډلې د پښتو ژبې مخکښ سندرغاړي هارون پاچا هم د انسټیټیوټ په پرانیست غونډه کې کډون کړی و.
نوموړي په خپله فیسبوک کې هیله کړې چې «پښتو میوزیک انسټیټیوټ به د يوه منظم سازمان په توګه د پښتو موسيقۍ د ساتنې او ودې په چارو کې اغېزناک رول ولوبوي.»
نوموړی وايي، دې غونډې ته یې د هغې يوې څېړنې په اړه معلومات ورکړل چې دې سازمان د پښتون افغان وطن د هنرمندانو د ټولنيز او اقتصادي حالت د ارزيابۍ په موخه کړې وه.
په دغه غونډه کې ځینو سندرغاړو او سیاسي فعالینو په انلاین بڼه هم کډون کړی و او د پښتو موسیقۍ پر اهمیت یې خبرې وکړې.
د غونډې په پای کې د پښتون سندرغاړي هارون باچا له خوا کنسرټ هم ترسره شو.
د هندي رسنیو د راپورونو له مخې، د ۲۰۲۵ کال په جنورۍ کې د شاهرخ خان، سلمان خان او عامر خان کوم فلم نندارې ته نه وړاندې کیږي. خو په دغه میاشت کې د دیوا او ایمرجنسي په څیر د ځینو فلمونو او ویب سیریزونو کتلو ته ډیر خلک په تمه دي.
د اوټي ټي پلې په نوم هندي اژانس د هندي سینما تولید شویو یو شمېر فلمونو او ویب سیریزونو نوملړ خپور کړی، چې د ۲۰۲۵ کال په لومړۍ میاشت کې په سینماګانو او اوټي ټي پلټ فورم نندارې ته وړاندې کیږي.
خو د فلمونو په دغه نوملړ کې د شاه رخ خان، عامر خان او سلمان خان نومونه نشته.
د راپورونو له مخې، په ۲۰۲۴ کال کې هم د هند سینما د ستري ۲، بهوبولییا۳، سینګم اګین، امرسینګ چامکېلا، فوشپا۲ او مونجیا په څیر غوره فلمونه تولید کړل چې د فلم علاقمدانو ډیر خوښ کړل.
د راتلونکي کال جنوري میاشت کې هم د دیوا، ایمرجنسي په څیر ځینې لوی فلمونه پر سینمګانو او اوټي ټي پي پلیټ فورم باندې خپریږي او خلک په بې صبرۍ ورته انتظار کوي.
جنووري کې د خپریدونکو فلمونو په لړ کې یو هم ایمرجنیسي فلم او ویب سیریز دی، چې د سانسور بورډ له اجازې وروسته د جنوري په ۱۷ خپریدو ته چمتو دی.
دا فلم د کنګنا راناوت لخوا لیکل شوی او لارښود شوی دی.
په دغه فلم کې د هند د لومړۍ ښخینه لومړۍ وزیرې اندراګاندي په ژوند او ختونو باندې تمرکز شوی.
د یاد فلم په مرکزي لوبغاړو کې د کنګناراناوت ترڅنګ انوپم کهیر هم مهم رول لري.
دا فلم د ۲۰۲۴ کال په سپټمبر میاشت کې یوځل پر سینمګانو نندارې ته وړاندې شو، خو وروسته فلم د سک مذهبو د شکایت له امله جنجالي شو او اوس د دوهم ځل لپاره نندارې ته وړاندې کیږي.
همدارنګه پټال لوک سریز دوهم فصل هم په جنوري میاشت کې پر پرایم ویډیو باندې خپریږي.
د راپورونو له مخې، د روشنز په نوم یو ډاکومینټري سیریز هم پر نټفلیکس د جنوري په ۱۷مه خپریږي.
نیټ فلکس د روشن کورنۍ - روشن لال، راجیش روشن، راکیش روشن او ریتیک روشن د سفر او میراث په اړه د مستند لړۍ اعلان کړه. دا لړۍ په هندي سینما کې د روشن کورنۍ د څو نسلونو سفر تعقیبوي.
خو په دې نوملړ کې د دیوا په نوم د شاهد کپور یو اکش فلم هم شته. چې د شاهد کپور ترڅنګ بوجا هیګډي به هم په مرکزي رول کې راڅرګنده شي.
دغه فلم د روشان انډریوز په لارښونه جوړ شوی او د جنوري په ۳۱مه نېټه به په سینمګانو کې نندارې ته وړاندې شي.
په دې نوملړ کې د اکشای کمار په اداکارۍ د سکای فورس په نوم هم یو فلم د جنوري په ۲۴مه نېټه په سینمګانو کې نندارې ته وړاندې کیږي.
د معلوماتو له مخې، دا فلم د ۱۹۶۵ کال د پاکستان د سرګودها برید پر بنسټ جوړ شوی دی.
همدارنګه د ۲۰۲۵ کال د لومړۍ میاشتې په ۱۷ نېټه د ازاد په نوم یو فلم چې مرکزي رول کې یې راشا تهداني او امان دیوګن لوبیدلي دي پر سینماګانو ننداري ته وړاندې کیږي.
دغه فلم چې د هند د ازادۍ څخه مخکې دورې په اړه د اسانو او یوې کورنۍ د اړیکو په اړه کیسه لري، اجې دیوګن، ډیانا پینټي، پیوش مشرا، جیا امین، ډلان جونز او موهیت ملک هم پکې لوبیدلي دي.
د هندي رسنیو د راپورونو له مخې، د ۲۰۲۵ کال په لومړۍ میاشت کې د بالیوډ د خانونو کوم فلم نشته.
د طالبانو تر واک لاندې باختر اژانس نن دوشنبه د (لیندۍ ۲۶مه) خبر ورکړی چې په افغانستان کې د یونسکو دفتر مشرې پاتریشیا مک فیلیس د غور ولایت له تاریخي جام منار لیدنه کړې ده. نوموړې ویلي چې په دې هڅه کې ده؛ څو د دغه تاریخي منار د خوندیتوب لپاره مالي سرچینې ومومي.
په افغانستان کې د یونسکو مشرې دغې تاریخي ابدې ته د ځانګړې پاملرنې غوښتنه کړې.
په دې راپور کې د اغلې مک فیلیس له قوله لیکل شوي چې د سېلانیانو د تګ راتګ او اسانتیاوو لپاره به د هریرود د سیند پر غاړه دې څلي ته جوخت یو نوی پل هم جوړ کړي.
د جام څلی چې د غوریانو د تمدن یو شهکار ګڼل کېږي په ۲۰۰۲ میلادي کال کې د یونسکو له لوري د نړۍوالو کلتوري میراثونو په نوملړ کې شامل شو.
تر دې پخوا هم څو څو ځله د جام منار د ځینو برخو د نړېدو خبرونه خپاره شوي وو؛ خو بیا رغونې ته یې لا تر اوسه پورې هېڅ ډول ځانګړې پاملرنه نه ده شوې او نه هم په دې برخه کې عملي ګامونه پورته شوي دي.
د هندي رسنیو د راپورونو له مخې د هند مشهور تبله غږوونکی ذاکر حسین د ۷۳ کلونو په عمر مړ شو هندي رسنیو ویلي، چې نوموړی د ډیسمبر میاشتې په ۱۵مه نېټه د امریکا د کالیفورنیا ایالت په فرانسیسکو ښار کې د سږو ناروغۍ له امله مړ شو.
ذاکر حسین د ۱۹۵۱ میلادي کال د مارچ په نهمه زیږیدلی و چې د خپل پلار الله رخا قریشي څخه یې تبله زده کړې وه او په کم عمرۍ کې یې نړۍوال شهرت ترلاسه کړ.
د هند لومړي وزیر نریندرا مودي د هغه پر مړینه ژوره خواشیني څرګنده کړې او هغه یې د هندي موسیقۍ نه تکراریدونکي پانګه وباله.
مودي زیاته کړې چې ذاکر حسین کلاسیکې هندي موسیقۍ ته نړۍوال شهرت ورکړ.
د موسیقۍ پوهان په دې باور دي چې نوموړي د خپل ژوند په اوږدو کې د هند د کلاسیکې موسیقۍ او عصري موسیقۍ د یو ځای کولو لپاره ځانګړي نوښتونه وکړل.
د موسیقۍ د پوهانو په وینا؛ ذاکر حسین د هند لرغونې موسیقي په خورا ښه شان سره د نړۍ د موسیقۍ له نورو جریانونو سره شریکه کړه چې له دې سره یې تبله له عصري موسیقۍ سره یوځای کړه.
د هندي سینما مشهورو ستورو هم د ذاکر حسین د مړینې له کبله د هغه مینه والو سره خواخوږي کړې ده.
ښاغلي حسین ته د هند د دولت له لوري سترې دولتي جایزې ورکړل شوي چې په کال ۱۹۸۸ کې یې د پدماشري او په ۲۰۰۲ میلادي کال کې یې د پدما بهوشن په نوم د هند سترې ملکي جایزې ګټلې وې.
هغه همدا راز یو شمېر نړۍوالې جایزې هم ترلاسه کړې وې او د نړۍ په بېلابېلو هېوادونو کې یې د موسیقۍ په فیسټیوالونو کې تبله غږولې وه.
ذاکر حسین له یوې نڅاګرې انتونیا مینیکولا سره واده کړی و چې ترې دوه لوڼې لري او هغوی هم د موسیقۍ پر مسلکي زده کړو او فلم جوړونې بوختې دي.
د هندي رسنیو د راپور له مخې، د هند سینمايي ستوری الو ارجون د پوشپا ۲ فلم د نندارې پر مهال په سینما کې د ګڼې ګوڼې له امله د اوښتې مرګ ژوبلې په تور په ۱۴ ورځني بند محکوم شوی.
انډیا ټلویزیون راپور ورکړی، چې د سندیا په سینما کې د ګڼې ګوڼې له امله د یوې ښځې د مړه کېدو په قضیه کې د جمعې په ورځ الو ارجون د حیدراباد پولیسو ونیو.
د راپورونو له مخې، د هند سینمايي ستوری او د ملي جایزې ګټونکی الو ارجون نن ۱۴ ورځني قضايي توقیف ته استول شوی دی.
د الو ارجون وکیلانو د دې پرېکړې پر ضد په ستره محکمه کې د استیناف غوښتنه کړې ده.
دغه پېښه د روانې میاشتې په ۴ نېټه د شپې ناوخته په سینما کې د پوشپا۲ فلم د نندارې پر مهال شوې وه.
په دغه شپه چې الو ارجون سینما ته ورسید، د نوموړي د مینه والو ګڼه ګوڼه له کنټروله ووتله، چې د ټیل ماټیل له امله یې یوه ۳۹ کلنه ښځه مړه شوه.
له پېښې وروسته، د سینما او اداکار په وړاندې شکایت ثبت شو.
هغه ښځه چې په ګډوډۍ کې مړه شوه، نوم یې ریواتي ښودل شوی او د دل سوخ نگر اوسیدونکې ده.
نوموړې د خپل خاوند بھاسکر او د دوی د دوو ماشومانو سره د پوشپا ۲فلم نندارې لیدو ته راغلې وه.
د راپورونو له مخې، که نوموړی په یاده قضیه کې تورن ثابت شي، نو له یو څخه تر لس کاله بند سزا به ورکول شي.
له پېښې دوه ورځې وروسته، الو ارجون د یوې ویډیو په شریکولو سره خواشینې څرګنده کړې او د ښه نیت په توګه یې د مړې ښځې کورنۍ ته یې د ۲۵ لکه هندي روپیو د ورکول اعلان وکړ.
همدارنګه نوموړي په یاده پېښه کې د ټولو ټپیانو د درملنې د لګښونو د پوره کولو وړاندیز هم کړی.
که مو پام وي ځیني وختونه شیان، نومونه، شمېرې، ادرسونه یا نور توضیحات هېروو، په خاصه توګه اوسنۍ زمانه کې چې ژوند ډېر مصروف دی.
که څه هم دا د اندېښنې وړ خبره نه ده، مګر په مکرر ډول دا هر څه د حافظې د ضعف نښه کېدای شي.
ښه خبره دا ده، چې د عمر په ډېرېدو سره د حافظې پیاوړي کول ډېر ستونزمن کار نه دی.
برېتانیا کې یوې طبې څېړنې ښودلې، چې که هره ورځ ورزش وکړئ، دا کار کولی شي چې د حافظې په پیاوړي کېدو کې مرسته وکړي.
د لندن کالج یونیورسیټي یوې څېړنې موندلې، چې ورزش نه یوازې جسمي روغتیا ته وده ورکوي، بلکې تر بلې ورځې پورې حافظه هم ښه کوي.
څېړنې موندلې، چې هره ورځ د ۳۰ دقیقو لپاره له اسانه ورزش څخه نېولې تر سخت پورې او هره شپه لږ تر لږه ۶ ساعته خوب کول د راتلونکې ورځې لپاره د حافظې فعالیت ښه کوي.
دغه څېړنه پر ۷۶ کسانو ترسره شوې، چې عمرونه یې له ۵۰ څخه تر ۸۳ کلونو پورې وو.
دغو کسانو ذهني روغتیا ښه وه او دوی د تعقیبونکي په ذریعه د هغوی خوب او نور فعالیتونه تر اتو ورځو وڅارل شول.
پایلو ښودلې ده، چې ۳۰ دقیقې منظم قوي فعالیت کولی شي چې راتلونکې ورځې لپاره حافظه ښه کړي.
څېړونکي وایي، پایلې ښیې چې فزیکي فعالیت د حافظې لپاره ښه دی او ښه خوب دا ګټه ډېروي.
څېړونکو زیاته کړې، چې فزیکي فعالیت مخکې هم د حافظې فعالیت په لنډمهاله توګه ښه کولو او د هېرولو د ګواښ د کمېدو لامل هم کېږي.
د څېړونکو په وینا، په پخوانیو څېړنو کې اغیزې لنډ مهاله وې او ډېری په لابراتوار کې ترسره شوې وې.
مګر په نوې څېړنه کې د حقیقي ژوند ورځیني فزیکي کارونه اغېزې وڅېړل شوې، چې پایلو وښودله چې دا نه یوازې حافظه ښه کوي بلکې اغېزې یې هم تر ډېره پاتې کېږي.
څېړنې دا هم ښودلې که ورځینۍ ناسته کې ۳۰ دقیقې زیاتوالی راشي دا هم پر حافظې منفي اغېزې کوي.
په هرصورت، هغه خلک چې لږترلږه ۶ ساعته خوب کوي، د حافظې، تمرکز او فزیولوژیکي غبرګون کارونو کې ښه ترسره کوي.
هغه کسان چې هره شپه لږ تر لږه ۶ ساعته خوب کوي د حافظې تمرکز او د انسان جسم قوي کوي.
څېړونکو دا هم منلې، چې دا څېړنه په محدوده وه او دا لا معلومه نه ده، چې د نن ورځې ورزش ولې د بلې ورځې لپاره په حافظې مثبت اغېز لري.
یادونه
تاسو هم ورزش د خپلو ورځینیو کارونو په نوملړ کې اضافه او خپله حافظه قوي کړئ.