په ملګرو ملتونو کې د افغانستان د خلکو استازي نصیر احمد فایق د طالبانو له لورې په غیر دولتي موسسو کې د ښځو په کار د بندیز په غبرګون کې ویلي، چې د فشارونو زیاتوالی او د وسیلې په توګه د بشردوستانه مرستو کارول له افغان ولس سره د دوښمنۍ ښکاره بېلګه ده.
د طالبانو اقتصاد وزارت د دغه ډلې د مشر ملا هبت الله د تازه فرمان له مخې په یوه مکتوب کې نادولتي موسسو ته خبرداری ورکړی، چې ژر تر ژره دې ښځینه کارکوونکې له دندو لرې کړي.
د طالبانو د اقتصاد وزارت له لوري اکبر موسسې ته استول شوي مکتوب کې کورنیو او بهرنیو اینجوګانو ته ګواښ شوی، چې د سرغړونې په صورت کې به یې جوازونه لغوه کړي او دفترونه به یې هم ور وتړي.
نصیر احمد فایق په خپل اېکس کې لیکلي: «په داسې حال کې چې افغانستان د یوه مشروع، مسوول او ټول شموله نظام په نه شتون کې له نړۍوال انزوا، سیاسي، اقتصادي او ټولنیزې بې ثباتۍ سره مخ دی او ځمکنۍ بشپړتیا یې تر پښو لاندې کړې، د فرمانونو صادرول د افغان ولس په ځانګړې توګه پر ښځو د فشارونو او محدودیتونو د زیاتولو لړۍ دوام لري».
یاده دې وي، چې طالبانو له دغه پرېکړې وړاندې نادولتي موسسو ته په شفاهي بڼه د ښځو د کار کولو په اړه سپارښتنې کړې وې او زیات شمېر موسسو په دفترونو کې د دغه سپارښتنو له مخې د نجونو د کار ځایونه له نارینه و جلا کړي وو او حجاب هم پرې جبري شوی وو.
د طالبانو بیا واکمنېدو سره دغې ډلې په افغانستان کې د ښځو پر وړاندې سخت قوانین تطبیق کړي دي.
د ښځو او نجونو پر زده کړو بندیزونه، له تفریحي ځایونو راګرځول، له محرم پرته د سفر محدودیتونه، د ښځو د ټولنیزو او سیاسي مشارکت مخنیوی او لسګونه نور موارد هغه څه دي، چې افغان مېرمنې ورسره لاس او ګرېوان دي.
