علي امین ګنډاپور: په بهرني فشار باوري نه یو، عمران خان به د خلکو په زور خوشې کېږي
د خيبر پښتونخوا سر وزير علي امين ګنډاپور ويلي، چې په بهرني فشار باور نه لري؛ بلکې د خلکو په زور به د پاکستان د تحريک انصاف بنسټګر عمران خان خوشې کېږي.
د خيبر پښتونخوا سر وزير علي امين ګنډاپور ويلي، چې په بهرني فشار باور نه لري؛ بلکې د خلکو په زور به د پاکستان د تحريک انصاف بنسټګر عمران خان خوشې کېږي.
هغه له جيو نيوز سره په خبرو کې د مذاکراتو په اړه وويل: «زه به په مذاکراتي کمیټه کې هرو مرو شامل شم.»
د هغه په وینا، عمران خان د خپل ځان پر ځای د پاكستان د راتلونکې لپاره مذاكراتي كمېټه جوړه كړې ده.
هغه زیاته کړې: «عمران خان به د ولس په زور راخوشې شي. موږ په بهرنیو فشارونو باور نه لرو، موږ يوازې په خدای باور لرو.»
علي امین ګنډاپور وویل، چې دومره لوی ګوند نه بهرني فشار او نه هم بهرنۍ بیانیې ته اړتیا لري.
بل خوا د پاکستان قامي اسمبلۍ د جنورۍ په دویمه نېټه د تحريک انصاف او حکومت د مذاکراتي کميټو غونډه رابللې ده.
تحریک انصاف به په دغې غونډه کې د دغه ګوند د مشر د خلاصون غوښتنه کوي.
له بل پلوه د پاکستان د دفاع وزیر خواجه اصف ویلي: «زه د مذاکراتو مخالف نه یم، زه په وار، وار دا پوښتنه کوم چې هغه کس چې نه یې غوښتل زموږ سره لاس یو کړي اوس څه شو؟ په دې کس کې دا بدلون څنګه راغی؟»
هغه ویلي، چې په تحریک انصاف ګوند كې د سنجيده ګۍ كمی دی.
د هغه په وینا: «زه دوعا كوم، چې مذاكرات دې بريالي شي، زه سل په سلو كې د دغو خبرو اترو پلوی يم.»
تر دې وړاندې هم علي امین ګنډا پور د پخواني لومړي وزیر عمران خان په خوشې کولو ټینګار کړی او څو ځلې یې ستر لاریونونه وربللي و، چې تر ډېره په تاوتریخوالي واوښتل او د ځاني زیانونو تر څنګ یې ګڼ مالي زیانونه هم اړولي وو.
د هغو لاریونونو په ترڅ کې د تحریک انصاف سلګونه کسان هم په اسلام اباد کې تر نیولو وروسته بندیان شوي وو.
