د امریکا متحده ایالتونو په نیو اورلیانز کې پر ګڼه ګوڼه د موټر د برابرېدو پېښه کې لږ تر لږه ۱۰تنه مړه او ۳۰ نور ټپیان شوي دي. دغه موټر د ښار په تاریخي فرېنچ کوارټر سیمه کې د نوي کال پر مېله کوونکو ورسیخ شوی دی.
عیني شاهدان وايي، د پېښې په ځای بوربن کوڅه کې یوه ستره ډله د نوي کال د جشن نمانځنې لپاره راغونډه شوې وه.
د پېښې په اړه لا ډېر جزئیات نه دي خپاره شوي، خو سي بي اېس د عیني شاهدانو له خولې ویلي و، چې موټر په لوړ سرعت پر خلکو ورغی او بیا موټر چلوونکی له موټره کوز شو او ډزې یې وکړې. پولیسو ځوابي ډزې کړې دي، خو د نیو اورلیانز پولیسو اې بي سي نیوز ته ویلي چې بریدګر تر اوسه نه دی نیول شوی.
سي اېن اېن رپوټ ورکړ، چې د نیو اورلیانز پولیسو د برید سیمه کلابنده کړې ده.
نیو اورلیانز له دې وړاندې هم د جشنونو او پریډونو پرمهال د ورته پېښو شاهد پاتې شوی.
د روان کال د نومبر په پای کې د نیو اورلیانز پولیسو د دغه ښار په سیمه ییز دودیز جشن کې چې په زرګونو کسانو پکې ګډون کړی و، د ډزو د دوو پېښو خبر ورکړ.
سیمه ییزو رسنیو ویلي، چې په دغو ډزو کې دوه تنه وژل شوي او لس نور ټپیان شوي وو.
د ۲۰۱۶ کال په مارچ میاشت کې یو پک اپ چې چلوونکي یې د پولیسو په وینا ډیر شراب څښلي وو، د ماردي ګراس کارنیوال پریډ پر مهال له خلکو سره ټکر وکړ او تر ۲۰ زیات کسان یې ټپیان کړل.
