واشنګتن پست راپور ورکړی، چې له افغانستانه د امریکایي ځواکونو د بیړنۍ او ناڅاپي وتلو وروسته د سپینې ماڼۍ د ملي امنیت سلاکار جک سلیوان اړ شو چې استعفا وکړي، خو ولسمشر بایډن د هغه استعفا و نه منله.
دغې ورځپاڼې د ښاغلي سلیوان د همکارانو له خولې د سې شنبې په ورځ د مرغومي په ۱۱مه راپور ورکړ هغه مهال د بایډن ټینګار دا و چې هغه دې پر خپلې دندې پاتې شي.
له افغانستانه د امریکایي ځواکونو له وتلو وروسته د بایډن حکومت د ملي امنیت ډله سره وویشل شوه، د سلیوان او د امریکا د بهرنیو چارو وزیر انتوني بلینکن تر منځ درز رامنځته شو.
د ۲۰۲۱ کال په اګست میاشت کې له افغانستانه د امریکایي ځواکونو د وتلو پر مهال د دغو ځواکونو ۱۳ تنه ووژل شول او د افغانستان شل کلن حکومت هم ورسره ړنګ شو.
د امریکا د ملي امنیت شورا سلاکار دغې ورځپاڼې ته ویلي:«تاسو نه شئ کولای په افغانستان کې هغه جګړه پای ته ورسوئ چې له هغې سره مو تړاو پیدا شوی، پرته له دې چې د هغې جګړې پای ستاسو له پاره ننګونې و نه زیږوي، غوروای دا و چې: یا ولاړ شه او یا هم د تل لپاره پاتې شه چې دا اسانه چاره نه وه.»
ښاغلي سلیوان زیاته کړه چې له افغانستانه د امریکایي ځواکونو وتنه متحده ایالاتو ته دا امکان برابر کړ چې «پر اوکراین د روسیې د یرغل پر وړاندې دغه لاره غوره کړي، زموږ پاتې کېدل هلته نور ناشوني و.»
د بایدن پر وړاندې د پنتاګون مقاومت
د واشنګټن پست د راپور له مخې، پنتاګون له افغانستانه د امریکایي ځواکونو په چور لټې وتنې له بایډن سره مقاومت وکړ او «په کابل کې د ۲۵۰۰ ځواکونو » د پاتې کېدو غوښتنه یې کوله.
د وال سټریټ ژورنال خبریال الیکس وارډ وایي، هیچا هم له افغانستانه د وتلو په کار کې د استعفا وړاندیز نه و کړی.
سپینه ماڼۍ او د امریکا د ملي امنیت شورا لا تر اوسه د دغه راپور په اړه څه نه دي ویلي.
له افغانستانه د امریکایي ځواکونو د بیړنۍ وتنې وروسته په امریکا کې جدي بحثونه پورته شوي.
د امریکا د استازو جرګې د بهرنیو اړیکو کمیسیون څو ځلې امریکایي جګپوړي چارواکي د شهادت ورکولو لپاره وربللي دي.
په وروستي ځل دغې کمېټې د امریکا د بهرنیو چارو وزیر انتوني بلینکن هم د یو لړ پوښتنو لپاره یادې جرګې ته وربللی و.
