د کډوالو لپاره د ملګرو ملتونو عالي کمېشنرۍ د «مرغومې ۱۴مه) د جمعې پر ورځ ویلي چې له لسیزو راهیسې جګړې او بې ځایه کیدل هغه لاملونه دي چې له کبله یې ډېری افغانان د پېژند پاڼو او معتبرو مدني اسنادو څخه بې برخې پاتې شوي دي.
یو این ایچ سي ار وايي، له پاکستان او ایرانه هېواد ته ډېر راستنیدونکي کډوال له دغو ستونزو سره مخامخ کېږي.
د دغه نړیوال سازمان د معلوماتو له مخې د معتبرو مدني اسنادو او پېژندپاڼو د نشتوالي له امله هېواد ته بېرته راستنیدونکي کسان له یو لړ حیاتي ستونزو سره مخ کېږي.
د کډوالو لپاره د ملګرو ملتونو د عالي کمیشنرۍ د خبرپاڼې له مخې تازه راستانه شوي افغانان د دغو اسنادو د نشتوالي له امله په ښوونځیو کې ماشومانو نوملیکنه، سیم کارت او پاسپورټ ترلاسه کولو پر مهال له خنډونو سره مخ شوي دي.
غلام رسول چې څو میاشتې وړاندې له خپلې پنځه کسیزې کورنۍ سره یو ځای له ایرانه بېرته هېوا ته راستون شوی او اوس په هرات کې مېشت دی هم د پېژند پاڼو د نشتوالي له کبله له ګڼو ستونزو سره مخ شوی دی.
هغه وايي: « لومړی چې موږ تذکرې نه درلودې هره برخه کې راته ستونزې وې او اولادونه یې هم راته ښوونځي کې نه شاملول».
د ملګرو ملتونو عالي کمېشنرۍ خبرورکوي چې د پېژند پاڼو او نورو معتبرو مدني اسنادو د ترلاسه کولو لپاره بېرته راستنیدونکو ته د عامه پوهاوي پروګرامونه چمتو کوي.
د دغه سازمان د شمېرو له مخې تېر کال یوازې په هرات کې د عامه پوهاوي دغه پروګرام کې دوه زره ښځینه وو ګډون کړی و او د پېژند پاڼو په ترلاسه کولو کې یې ورسره مرسته کړې ده.
