د جګړې څارونکو د یکشنبې په ورځ وویل، چې د سوریې په شمال کې په تېرو دوو ورځو کې د ترکیې له ملاتړه برخمنو ډلو او د سوریې د کرد ځواکونو ترمنځ په نښتو کې تر سلو زیات جنګیالي وژل شوي دي.
د سوریې د بشري حقونو د څار ډله وايي، چې د جمعې له ماښام راهیسې د منبج ښار په شاوخوا کې په نښتو کې ۱۰۱ تنه وژل شوي، چې ۸۵ تنه یې د ترکي پلوه ډلو او ۱۶ د کردانو تر واک لاندې د سوریې ډیموکراټيک ځواکونو (اېس ډي اېف) غړي دي.
د سوریې ډیموکراټيکو ځواکونو ویلي، چې دوی "د ترکیې د اجیرانو ټول بریدونه چې د ترکیې د بې پیلوټه الوتکو له خوا یې ملاتړ کېږي په شا تمبولي."
د سوریې په شمال کې د ترکیې تر ملاتړ لاندې ډلو په داسې حال کې له (اېس دي اېف) سره خپله جګړه بیا پیل کړه، چې د اپوزیسیون وسله والو ځواکونو د نومبر په ۲۷ مه د سوریې ولسمشر بشارالاسد له واکه لرې کړ.
دوی بریالي شول، چې د حلب په شمالي ولایت منبج او تل رفعت ښارونه د سوریې له ډيموکراټيکو ځواکونو څخه ونیسي.
د څارونکو د مشر رامي عبدالرحمان په وینا، د ترکیې ملاتړې ډلې له دې وړاندې چې رقه ونیسي موخه لري، چې د کوباني او تبقا ښارونه په خپله ولکه کې راولي.
اېس ډي اېف د سوریې په شمال ختیځ کې پراخې سیمې او په ختیځ کې د دیر الزور ولایت ځینې برخې خپله ولکه کې لري او په دې سیمو کې کردانو په ۲۰۱۱ کې د کورنۍ جګړې پرمهال د حکومتي ځواکونو له وتلو وروسته یوه خپلواکه اداره رامنځته کړه.
دغې ډلې چې د امریکا ملاتړ ورسره دی، د رقې په ګډون د خپلې اوسنۍ سیمې ډېره برخه د داعش له سخت دریځو نیولې او تر خپلې ولکې لاندې یې راوستې ده.
